„Mjög slæmt tap, við komum ágætlega inn í leikinn og það var jafnræði með liðunum fyrstu 25 mínúturnar. Svo fáum við á okkur þetta mark. VIð reynum að sækja og fáum vítið en það klikkar og þá gefum við eftir," sagði Helgi Sigurðsson þjálfari Fylkis eftir 5-1 tap gegn KA á Greifavellinum á Akureyri í dag.
Fylkismenn komu sterkir inn í seinni hálfleikinn.
„Við komum vel inn í seinni hálfleikinn og menn voru staðráðnir í að koma sterkir inn. Svo verður þetta erfitt þegar þú ert orðinn 10 á móti 11 í hálftíma, 2-0 undir. Auðvitað eru menn að reyna en við vorum aldrei nálægt því að komast inn í leikinn eftir rauða spjaldið."
Ásgeir Eyþórsson fékk sitt seinna gula spjald á 68 mínútu.
„Það er alveg ljóst að ég gerði mistök þar. Ef menn geta ekki haldið sér inn á vellinum, þá er það þannig. Ásgeir hefur samt gert marga góða hluti og ég ætla ekki að kenna honum um þetta. Þetta er ekkert það sem gerir útslagið. Við vorum komnir 2-0 undir sem er mjög slæmt. Við erum búnir að fá mikið af mörkum á okkur í fyrri hálfleikjum. 13 mörk í þremur leikjum það er bara alltof mikið fyrir gott lið eins og við erum."
Fylkir byrjaði tímabilið vel en hafa fengið á sig 13 mörk í síðustu þremur leikjum.
„Það er hægt að fara um víðan völl. Við erum með unga vörn og ungan markmann sem hafa kannski litla reynslu í Pepsí-deildinni, þeir þurfa sinn tíma. Við komum sterkir inn í þetta mót og gerðum það vel en síðan þegar mótlætið kemur fara menn aðeins inn í skel. Það er ekkert bara þessir ungu heldur fleiri leikmenn í liðinu. Við erum í þessari bátsferð hér í sumar og við verðum bara allir að róa í sömu átt."
Ólafur Ingi var ekki í hóp í dag eins og einhverjir höfðu búist við.
„Hann var með fjölskyldunni í fríi eftir HM og við vissum alveg af því að hann væri ekki að koma til okkar strax. Þannig það er ekkert óvænt í því, hann er klár í næsta leik. Það verður mikill styrkur fyrir okkur en við verðum að passa okkur á því að Ólafur einn mun ekki snúa hlutunum við. Það þurfa allir að stíga upp í þessu liði og fyrir utan liðið."
Hægt er að horfa á viðtalið í heild sinni í sjónvarpinu hér að ofan.
Athugasemdir