Öllum leikjum dagsins er nú lokið í Inkasso-deild kvenna.
Keflavík og Fylkir mættust í Keflavík í toppbaráttuslag en fyrir leikinn var Keflavík taplaust í 1. sæti og Fylkir í 2. sæti.
Leikurinn var gríðarlega jafn og var hann markalaus fram á 82. mínútu þegar Sunna Baldvinsdóttir skoraði eina mark leiksins fyrir Fylki og tryggði Árbæingum sigur. Fylkir er nú einu stigi á eftir Keflavík og á leik til góða.
Í Laugardalnum mættust Þróttur og ÍA. Þróttarar komust yfir á 29. mínútu með marki frá Gabrielu Mariu Mencotti og var staðan 1-0 í hálfleik. Skagakonur jöfnuðu leikinn á 54. mínútu með marki frá Bergdísi Fanney Einarsdóttur. Bergdís var aftur á ferðinni á 87. mínútu og tryggði ÍA útisigur.
ÍA heldur í við toppliðin og hefur 28 stig en Fylkir á þó tvo leiki inni á Skagakonur og Keflvíkingar einn leik.
Þróttur stimplaði sig líklegast út úr baráttunni um sæti í efstu deild í kvöld.
Í neðra Breiðholtinu tóku ÍR-konur á móti Aftureldingu/Fram. Um var að ræða liðin í næst neðsta og þriðja neðsta sæti deildarinnar.
Stefanía Valdimarsdóttir skoraði tvö mörk fyrir Aftureldingu/Fram í fyrri hálfleik og ekki var meira skorað. Þetta var aðeins annar sigur gestanna í sumar en með sigrinum jöfnuðu gestirnir ÍR-inga að stigum en sitja í sæti ofar vegna markatölu.
Afturelding/Fram á leik inni á liðin í kring og getur komist upp í 6. sæti með sigri á Sindra í frestuðum leik í næstu viku.
Keflavík 0-1 Fylkir
0-1 Sunna Baldvinsdóttir ('82)
Þróttur 1-2 ÍA
1-0 Gabriela Maria Mencotti ('29)
1-1 Bergdís Fanney Einarsdóttir ('54)
1-2 Bergdís Fanney Einarsdóttir ('87)
ÍR 0-2 Afturelding/Fram
0-1 Stefanía Valdimarsdóttir ('5)
0-2 Stefanía Valdimarsdóttir ('21)
Athugasemdir