Arnar Hallsson og lærisveinar hans í Aftureldingu voru svekktir eftir markalaust jafntefli við Vestra í toppbaráttuslag í 2. deild karla í dag.
Lestu um leikinn: Afturelding 0 - 0 Vestri
„Við lögðum hann upp þannig að við ætluðum að vinna, það var aldrei spurning í okkar uppleggi. Þeir spilað svolítið djúpt yfirleitt og bíða, beita skyndisóknum og föstum leikatriðum. Mér fannst við leysa það ágætlega," sagði Arnar, þjálfari Aftureldingu.
„Þær þrautir sem þeir lögðu fyrir okkur - við leystum þær, en því miður náðum við ekki þessu marki sem skiptir máli."
Afturelding hefur farið í gegnum sex leiki í röð án sigurs, en er samt aðeins einu stigi frá toppnum.
„Ég held ekki," sagði Arnar aðspurður að því hvort þetta slæma gengi væri farið að hafa áhrif á sjálfstraustið. „Maður getur aldrei fullyrt neitt, en frammistaðan í flestum þessum leikjum, fyrir utan leikinn við Tindastól, hefur verið góð og hefur verið þannig að við höfum átt að vinna leikina. Í dag vorum við ekki það góðir að við áttum hiklaust að vinna, en við vorum skárri en þeir."
„Við erum bara að fara að vinna rest," sagði Arnar að lokum en viðtalið er í heild sinni hér að ofan.
Athugasemdir