Það var mikið skorað þegar Derby og Leeds mættust í lokaleik dagsins í ensku Championship-deildinni. Önnur umferð deildarinnar fer fram núna um helgina og bæði þessi lið voru með þrjú stig eftir fyrstu umferð.

Gestirnir byrjuðu betur í dag og Mateusz Klich kom þeim yfir strax á 6. mínútu, sex mínútum síðar var staðan orðin 1-1 en Tom Lawrence skoraði þá fyrir Derby.

Kemar Roofe kom gestunum aftur yfir tæpum 10 mínútum síðar og staðan var 1-2 þegar flautað var til loka fyrri hálfleiks.

Á 60. mínútu skoraði Kemar Roofe annað markið sitt og þriðja mark Leeds, fjórum mínútum síðar skoraði Ezgjan Alioski fjórða mark gestanna og þetta mark reyndist vera lokamark leiksins. Leeds byrjar vel þetta árið og er í öðru sæti með fullt hús stiga.