Joe Hart var keyptur til Burnley í sumar þar sem hann er í samkeppni við nokkra af betri markvörðum ensku úrvalsdeildarinnar.
Hart byrjaði fyrsta leik tímabilsins í dag gegn Southampton. Hann átti góðan leik og hélt hreinu, en Tom Heaton markvörður og fyrirliði Burnley sat á bekknum.
Þá voru hvorki Nick Pope né Anders Lindegaard í hóp, en Pope þótti standa sig frábærlega á síðasta tímabili og Lindegaard á 19 úrvalsdeildarleiki að baki fyrir Manchester United.
„Við spiluðum mjög vel í fyrri hálfleik en þeir sneru þessu algjörlega við í þeim síðari. Ég held að bæði lið geti verið sátt með stig," sagði Hart eftir jafnteflið.
„Ég er mjög ánægður með að vera kominn til Burnley. Ég labbaði inn í hreiður sem er fullt af topp markvörðum og þarf að vera upp á mitt allra besta til að halda byrjunarliðssætinu."
Hart var á láni hjá West Ham á síðasta tímabili. Hann spilaði 19 deildarleiki í heildina og hélt aðeins einu sinni hreinu á útivelli.
Athugasemdir