Lestu um leikinn: FH 0 -  2 ÍBV

„Við lögðum áherslur á þrjá hluti í þessum leik. Við ætluðum að vera yfir í baráttunni, þ.e.a.s við ætluðum að vinna návígin okkar, við ætluðum að hafa meiri ákefð en við höfum á haft í síðustu leikjum og síðan ætluðum við að loka fyrir föstu leikatriðin. Það tókst bærilega. Síðan voru aðrir þættir sem voru ekki að ganga."

„Þeir fara í gegnum okkur þegar þeir skora fyrsta markið og seinna markið kemur úr vítaspyrnu sem ég hef ekki séð aftur, en mín upplifun í leiknum var að þetta var þvæla miðað við það sem maður hefur séð í deildinni í sumar. Hendi víti. Gjörsamlega óskiljanlegt að finna út hvenær skal dæma slíkt," sagði Ólafur Helgi sem segir mikla vinnu vera framundan.

„Þetta eru vonbrigði og leikmennirnir þurfa stuðning frá okkur sem stöndum að þessu og mér sem ber ábyrgð á þessu. Við þurfum að vinna okkur út úr þessu saman."

Hann var sammála um að þessi leikur sé svolítið saga FH í sumar. Tap á heimavelli gegn liði í botnbaráttunni og á pappírunum á FH að vera töluvert betra lið en ÍBV.

„Við erum ekki að ná að kreista út úrslit í þeim leikjum sem eru töff eins og þessi. Við náum ekki að sækja okkur yfirburði. Við byrjuðum þennan leik prýðilega en náum ekki að setja mark eða stinga á andstæðingnum sem fær þá til að horfa meira niður í grasið en upp. Það er okkar saga," sagði Ólafur Helgi Kristjánsson þjálfari FH.

Viðtalið í heild sinni má sjá í sjónvarpinu hér að ofan.