Ragnar Bragi Sveinsson átti góðan leik er Fylkir gerði 1-1 jafntefli við FH í Pepsi-deild karla fyrr í kvöld.
FH komst yfir í fyrri hálfleik og lagði Ragnar Bragi jöfnunarmarkið upp snemma í síðari hálfleik. Hann slapp þá gegnum rangstöðugildru FH og renndi boltanum á Valdimar Þór Ingimundarson sem kláraði í opið markið.
„Þetta voru tveir ólíkir hálfleikar. Við vorum mjög passívir og bárum alltof mikla virðingu fyrir þeim í fyrri hálfleik. Í seinni hálfleik stigum við upp og þorðum að spila boltanum. Þá sýndum við það að við getum alveg spilað fótbolta bara ef menn hafa punginn í það, eins og við töluðum um í hálfleik," sagði Ragnar.
Fylkir er í þriggja liða fallbaráttu og man Ragnar vel eftir sumrinu 2016 þegar Fylkir féll með 19 stig úr 22 leikjum. Hann telur það eiga eftir að hjálpa liðinu á lokasprettinum.
„Maður þekkir þennan slag betur og við höfum brennt okkur á honum áður þannig við erum 110% klárir í þennan slag."
Það eru fimm umferðir eftir og á Fylkir næst heimaleik við Grindavík og svo útileik við Keflavík. Þar á eftir koma gríðarlega erfiðir leikir við Breiðablik og KR. Síðasti leikur tímabilsins er gegn Fjölni og gæti orðið úrslitaleikur um öruggt sæti.
Athugasemdir