Sigur á heimavelli gegn Skallagrími í úrslitakeppni 4. deildar nægði ekki fyrir Álftanes í dag. Heimamenn unnu 4-3 eftir framlengingu en gestirnir frá Borgarnesi fara áfram á útivallarmörkum.
„Það eru reglurnar, við spilum eftir reglunum þó manni finnist það að vissu leyti ósanngjarnt að menn fái auka 30 mínútur til að skora útivallarmark," sagði Marel Baldvinsson, þjálfari Álftaness, eftir leikinn.
„Við ætlum ekki að kenna reglunum um. Það sem varð okkur að falli er lélegur seinni hálfleikur. Við áttum góðan fyrri hálfleik en urðum svo full varnasinnaðir í seinni hálfleik."
Álftanes getur þó enn komist í 3. deildina þar sem liðið á eftir að spila úrslitaleik um síðasta lausa sætið í deildinni. Þar koma Kórdrengir sterklega til greina sem næstu andstæðingar, nema þeir skori minnst tvö mörk gegn Reyni Sandgerði á næstu 40 mínútum, manni færri.
Athugasemdir