fös 14. september 2018 14:30
Magnús Már Einarsson
Álitsgjafar spá í bikarúrslitaleik Breiðabliks og Stjörnunnar
Það verður hart barist á Laugardalsvelli á morgun.
Það verður hart barist á Laugardalsvelli á morgun.
Mynd: Fótbolti.net - Bára Dröfn Kristinsdóttir
Úr deildarleik liðanna á dögunum.
Úr deildarleik liðanna á dögunum.
Mynd: Fótbolti.net - Bára Dröfn Kristinsdóttir
Þorri Geir Rúnarsson og Kolbeinn Þórðarson í baráttunni.
Þorri Geir Rúnarsson og Kolbeinn Þórðarson í baráttunni.
Mynd: Fótbolti.net - Bára Dröfn Kristinsdóttir
Mynd: Fótbolti.net - Bára Dröfn Kristinsdóttir
Nágrannaliðin Breiðablik og Stjarnan mætast í úrslitum Mjólkurbikars karla á Laugardalsvelli klukkan 19:15 annað kvöld.

Fótbolti.net fékk nokkra álitsgjafa til að spá í spilin fyrir leikinn.



Aron Bjarki Jósepsson, KR
Stjarnan 3 - 1 Breiðablik
Þetta verður hörkuleikur á milli tveggja sterkra liða. Stjarnan vinnur þetta 3-1. Blikarnir halda hreinu í fyrri hálfleik og danski strikerinn þeirra laumar inn einu rétt fyrir leikhlé. Stjörnumenn mæta svo eftir leikhlé og pakka Blikunum saman. Gaui skorar tvö og Bikar Baldur neglir síðan síðasta naglann í líkkistu Blika og lyftir síðan bikarnum löðrandi i mjólk. Það á vel við því eins og alþjóð veit hefur Baldur drukkið 2 lítra af mjólk á dag alla sína ævi.
Til hamingju Stjarnan! 🏆

Hörður Snævar Jónsson, 433.is
Stjarnan 1 - 2 Breiðablik
Spá mín byggist á því að Ágúst Gylfason muni sjá að sér og koma með Elfar Freyr Helgason aftur inn í byrjunarlið Blika. Blikar hafa lekið inn miklu meira af mörkum eftir að Ágústi fannst það góð hugmynd að setja Elfar á bekkinn. Gengið hefur verið svipað en þar spilar stærsta rullu Thomas Mikkelsen, hann hefur komið með fleiri mörk í liðið. Damir Muminovic hefur ekki virkað sannfærandi á meðan Elfar er í frystikistunni hjá Gústa. Stjarnan hefur unnið fjóra leiki í röð gegn Blikum og þeir grænu hljóta að vilja ná fram hefndum. Gunnleifur Gunnleifsson verður maður leiksins og mun tryggja Blikum sinn fyrsta bikar í 8 ár. Guðjón Baldvinsson kemur Stjörnunni yfir áður en Gísli Eyjólfsson jafnar. Það verður svo Elfar "Lucio" sem klárar þetta fyrir pabbastrákana í Kópavogi.

Jóhann Alfreð Kristinsson, Mið-Ísland
Stjarnan 1 - 2 Breiðablik
Bæði lið mæta banhungruð í bikar. Ég sé ekkert annað en að það stefni í framlengingu í þessum leik. Stjörnumenn mæta öflugir til leiks og Hilmar Árni læðir einu í fyrri hálfleik. Blikar byrja að sækja í seinni háfleik eins og lög gera ráð fyrir og jafna metin með marki frá Oliver Sigurjóns. Framlenging. Við sjáum dramatík í henni. Ég set á þetta sigurmark frá Mikkelsen fyrir Blika í blálokin eftir jafnan leik. Við sjáum mjög hóflegt mjólkurbað hjá Blikum í kjölfarið. Hann verður orðinn ansi napur í Laugardalnum.

Lillý Rut Hlynsdóttir, Þór/KA
Stjarnan 1 - 2 Breiðablik
Þetta verður hörkuleikur og ekki verður stúkan síðri þar sem þessi lið eru bæði með hörkugóða stuðningsmenn. Leikurinn verður jafn en Breiðablik setur sigurmarkið í enda leiks. Gulli verður með stórleik í markinu.

Eiríkur Stefán Ásgeirsson, Stöð 2 Sport
Stjarnan 2 - 1 Breiðablik
Breiðablik vann síðast leik fyrir tæpum mánuði síðan og þá rétt svo marði liðið sigur á Víkingi Ólafsvík í undanúrslitunum eftir einhverjar ótrúlegustu lokamínútur í sögu bikarsins. Það var skellur fyrir Blikana að gefa jafn mikið eftir í deildinni og þeir gerðu, því má gera ráð fyrir að þeir muni gefa allt sitt í bikarúrslitaleikinn. Engu að síður tel ég að Stjarnan sé með betra lið eins og málin standa nú og spái ég Garðbæingum 2-1 sigur og langþráðum bikartitli.

Ingvi Þór Sæmundsson, Fréttablaðið
Stjarnan 1-1 Breiðablik (3-4 eftir vító)
Morgundagurinn verður góður fyrir Kópavog. HK byrjar á að tryggja sér sæti í Pepsi-deildinni og svo verður Breiðablik bikarmeistari um kvöldið. Síðustu bikarúrslitaleikir Stjörnunnar og Breiðabliks hafa farið í vítaspyrnukeppni og þessi gerir það líka. Baldur Sigurðsson skorar í fjórða bikarúrslitaleiknum og kemur Stjörnumönnum yfir en Thomas Mikkelsen jafnar fyrir Blika á elleftu stundu. Eitthvað segir mér að jafnaldri Sigmundar Davíðs í Blikamarkinu ráði úrslitum í vítakeppninni og lyfti svo bikarnum.

Arnar Sveinn Geirsson, Valur
Stjarnan 2 - 1 Breiðablik
Þarna eru að mætast tvö frábær lið sem hafa verið að spila mjög vel í allt sumar. Breiðablik verið í smá brekku í deildinni, en bikarinn er allt annað dæmi og auðvelt að gleyma öllu öðru sem er í gangi nema akkúrat þessum leik. Stjarnan verið mjög stabílir í sínum leik og gríðarlega erfiðir við að eiga. Ég myndi halda að þeir séu það lið sem hefur hvað mestu stemninguna innanborðs þessa dagana og eru að spila hvað best, svo að því sögðu held ég að Stjarnan klári þennan leik. Þetta verður stál í stál en gæði og stemning Stjörnuliðsins mun sigla þessum titli upp í Garðabæ. 2-1 Stjarnan þar sem sigurmarkið kemur á síðustu 10.

Pablo Punyed, KR
Stjarnan 3 - 1 Breiðablik
Breiðablik skorar snemma þegar Gísli skorar með langskoti Stjarnan jafnar rétt fyrir hálfleik og taka síðan seinni hálfleikinn yfir og keyra yfir unga Blika. Bikarinn fer loksins í Garðabæ. Gaui og Hilmar skora fyrir Stjörnuna.
Athugasemdir
banner
banner
banner
banner