Alfreð Elías handsalar samninginn við Jón Steindór Sveinsson, formann deildarinnar og Einar Karl Þórhallsson, ritara og formann meistaraflokksráðs kvenna.
Alfreð Elías Jóhannsson, þjálfari kvennaliðs Selfoss, skrifaði í gær undir nýjan tveggja ára samning við félagið.
Undirskriftin fór fram á iðagrænum JÁVERK-vellinum eftir 1:0 sigur Selfoss á ÍBV í lokaumferð Pepsideildarinnar.
Alfreð tók við kvennaliði Selfoss eftir að það féll úr Pepsideildinni árið 2016, stýrði því beina leið aftur upp í Pepsideildina. Nýliðar Selfoss náðu mjög góðum árangri í sumar og höfnuðu í 6. sæti deildarinnar með 20 stig.
„Á þessu tímabili höfum við verið að gefa mörgum ungum heimastelpum sénsinn og það er það sem er skemmtilegt, að byggja á því sem við höfum hér. Það er vínrauði þráðurinn hjá okkur,"sagði hann í tilkynningu félagsins.
„Ég er ánægður með starfsumhverfið, gott starfsfólk, þjálfunarkúltúrinn er góður og það er ótrúlega vel haldið utan um kvennaliðið. Það eru margir sem koma þar að, bæði á hliðarlínunni og bakvið tjöldin. Ég stefni á að gera betur með þetta lið næsta sumar, það tekur tíma að byggja upp gott lið og ég fæ tíma til þess og er ánægður með það," bætti hann við.
Athugasemdir