Birkir Bjarnason skoraði fyrra mark Íslands gegn Frökkum í kvöld er liðin gerðu 2-2 jafntefli en hann segir liðið enn hungrað í meiri árangur.
Lestu um leikinn: Frakkland 2 - 2 Ísland
Birkir skoraði á 30. mínútu en Alfreð Finnbogason undirbjó markið áður en Kári Árnason bætti við öðru. Frakkar komu til baka undir lok leiks með sjálfsmarki frá Hólmari Erni Eyjólfssoni áður en Kylian Mbappe skoraði úr víti.
„Við spiluðum rosalega góðan leik frá fyrstu mínútu. Að vera 2-0 yfir á móti svona liði er frábært og gott fyrir okkur að sýna að við erum ekki búnir eins og hefur komið fram," sagði Birkir við Fótbolta.net.
„Í síðustu tveimur leikjum vorum við með ótrúlega mikið af breytingum, sex nýja leikmenn. Það er ekki það að þeir séu nógu góðir, það er þannig að við höfum spilað á sama liðinu í fimm eða sex ár og þá er erfitt þegar það eru miklar breytingar því við náum ekki að æfa mikið saman."
Það er ekki uppselt á landsleik Íslands gegn Sviss á mánudag og hefur verið mikil gagnrýni á liðið eftir 6-0 tapið gegn Sviss og svo 3-0 tapið gegn Belgíu en frammistaðan í kvöld sýndi að það er enn hungur í liðinu.
„Ég vona það. Við höfum þörf á eins mörgum áhorfendum og við getum og vonandi sýnir þetta að við erum enn hungraðir og viljum vinna," sagði Birkir í lokin.
Hægt er að sjá viðtalið í sjónvarpinu hér fyrir ofan.
Athugasemdir