Arsene Wenger tilkynnti í dag að hann ætlaði sér að taka við knattspyrnuliði eftir áramót og er Robert Pires, fyrrverandi lærisveinn Wenger hjá Arsenal, ánægður með þá ákvörðun.
Pires telur knattspyrnuheiminn þurfa fleira fólk eins og Wenger, sem var við stjórnvölinn hjá Arsenal í 22 ár.
Pires spilaði undir stjórn Wenger frá 2000 til 2006 og unnu þeir úrvalsdeildina saman í tvígang.
Wenger, sem er 68 ára gamall, hefur verið orðaður við þjálfarastarfið hjá japanska landsliðinu og stjórnarstöðu hjá Paris Saint-Germain á dögunum.
„Vonandi finnur hann sér nýja áskorun. Knattspyrnuheimurinn þarf fólk eins og Arsene Wenger. Hann er ástfanginn af fótbolta og hefur mikla ástríðu," sagði Pires.
„Ég veit ekki hvað hann mun taka sér fyrir stafni en ég vonast til að sjá hann sitja aftur á varamannabekk sem fyrst."
Athugasemdir
