„Við höfum endurheimt gamla Arsenal" sungu stuðningsmenn Arsenal í síðasta leik liðsins, 5-1 sigrinum gegn Fulham. Það var níundi sigurleikur Arsenal í röð.

Unai Emery, stjóri Arsenal, segir að þessi söngur komi of snemma þar sem enn sé nóg pláss fyrir bætingu hjá liðinu og leikmönnum.

Arsenal mætir Leicester á mánudag.

„Ég er ekki alveg sammála þessum viðbrögðum stuðningsmanna. Ég tel að við þurfum að bæta okkur mikið," segir Emery.

„Það þarf að gera ýmislegt til að bæta okkur. Við þurfum að gera miklar kröfur. Stuðningsmenn geta notið þess með okkur en við horfum á raunveruleikann á hverjum degi."

„Í síðasta leik á Emirates (gegn Watford) þá unnum við en spiluðum ekki eins og við vildum. Við megum ekki fara fram úr okkur, það er mikilvægast núna. Komandi leikur gegn Leicester verður mjög erfiður."

„Leicester er mjög gott lið og spilar mjög skýran fótbolta undir Claude Puel. Þeir eru erfiðir viðureignar, með góða leikmenn og við þurfum á því að halda að allir okkar menn séu vel á tánum og með hausinn rétt skrúfaðan á," segir Emery.