Kvennalið Jamaíka var lagt niður árið 2010 en Cedella Marley, dóttir tónlistarmannsins Bob Marley var ekki á því máli og hefur stutt landsliðið fjárhagslega sem hefur hjálpað til við að ná þessum magnaða árangri.

Jamaíka sigraði Panama í vítaspyrnukeppni í Concacaf keppninni. Jamaíka náði forystunni tvisvar en Panama jafnaði í bæði skiptin. Leikurinn endaði í vítaspyrnukeppni þar sem Dominique Bond-Fasza skoraði úr lokaspyrnunni og kom landsliðinu á HM.

Landsliðsþjálfarinn var þakklátur Marley fyrir stuðninginn. Fyrir átta árum hætti knattspyrnusamband Jamaíka að styrkja kvennalandsliðið sem leiddi til þess að þær komust ekki á styrkleikalista FIFA vegna þess að liðið spilaði ekki leik í þrjú ár.

En árið 2014 mætti Marley á svæðið og hefur unnið hart að því að koma landsliðinu á kortið. Það hefur nú tekist og það verður áhugavert að sjá landsliðið á heimsmeistaramótinu næsta sumar.