Kári Árnason lék 90 mínútur í hjarta íslensku varnarinnar í 2-0 tapi gegn Belgum í kvöld. Kári átti flottan leik og var valinn maður leiksins af Fótbolti.net
Kári segir að það séu margir hlutir sem að íslenska liðið geti tekið úr leiknum í kvöld.
„Að sjálfsögðu. Við erum að spila nýtt kerfi með fimm manna varnarlínu og við náðum að mestu leyti að stoppa þeirra færi algjörlega í fyrri hálfleik. Þeir skora síðan úr báðum sínum færum í seinni hálfleik."
„Engu að síðu eru þarna hlutir sem að við þurfum að laga og mega ekki koma fyrir aftur."
Íslenska liðið glímdi við mikil meiðslavandræði í aðdraganda leiksins en Alfreð Finnbogason gat ekki tekið þátt eftir að hafa meiðst í upphitun.
„Þetta voru engar frábærar að heyra að Alfreð dytti út. Mér fannst við bregðast vel við þessu, Arnór kemur inn með litlum fyrirvara og stendur sig vel."
Kári segist hafa liðið vel í þriggja manna hafsentalínu en þetta hafi þó verið í nánast fyrsta skipti sem hann spilaði það.
„Þetta var mjög þægilegt og þeir sköpuðu sér lítið af færum."
Þrátt fyrir dapurt gengi undanfarið er Kári bjartsýnn fyrir komandi leiki.
„Að sjálfsögðu. Þetta var auðvitað erfitt verkefni að spila við þessi lið og fá síðan Frakkland í æfingaleik. Það er búið að vera stígandi í þessu og mótherjarnir eru að skapa færri og færri færi. Við þurfum hinsvegar að vera beittari fram á við."
„Við þurfum bara að fara að nota þessi föstu leikatriði sem að við fáum. Loka hornspyrnan fer með jörðinni á fyrsta mann, þetta er bara bannað. Við verðum allavega að fá sénsinn á að skalla þetta inn, en svona hlutir gerast."
Athugasemdir