Zlatko Dalic, landsliðsþjálfari Króatíu, hefur mikla trú á enska landsliðinu eftir að liðin mættust í ÞJóðadeildinni í dag.
Englendingar voru betri í leiknum en Króatar komust yfir snemma í síðari hálfleik og héldu forystunni þar til á 78. mínútu, þegar Jesse Lingard jafnaði.
Þetta var þriðja viðureign liðanna á fimm mánuðum. Króatía hafði betur í undanúrslitum heimsmeistaramótsins og svo gerðu liðin markalaust jafntefli í Króatíu.
„Þeir eru með ungt og kvikt lið. Fótboltinn er að koma heim (Football's Coming Home), mjög fljótlega," sagði Dalic.
„Að mínu mati fór England fram úr væntingum á heimsmeistaramótinu. Þeir eru með gífurlega snögga leikmenn sem eru afar mikilvægir í knattspyrnuheiminum í dag.
„Ég vil óska Englandi til hamingju með verðskuldaðan sigur og fyrir að komast í úrslitakeppni Þjóðadeildarinnar."
Króatía var án Ivan Rakitic í leiknum og segir Dalic að menn hafi verið þreyttir gegn Englandi, Króatía lagði nefnilega Spán að velli í hörkuleik síðasta fimmtudag.
„Við erum ekki með sérlega mikla breidd í hópnum þannig menn voru mjög þreyttir eftir leikinn gegn Spáni."
Athugasemdir