Árið 2018 hjá þýska landsliðinu hefur verið martröð líkast. Heimsmeistararnir frá 2014 hafa verið ógnarsterkir undanfarin ár en á þessu ári hefur lítið sem ekkert gengið upp hjá Þjóðverjum.
Þjóðverjar voru taplausir í fimmtán landsleikjum árið 2017 og með markatöluna 43-12. Fáir gátu því séð fyrir eins dapurt gengi á þessu ári og raunin varð.
Þýskaland hefur unnið fjóra leiki á þessu ári, gert þrjú jafntefli og tapað sex. Markatalan er í mínus eða 14-17. Þjóðverjar hafa aldrei áður tapað sex landsleikjum á sama árinu.
Á HM í Rússlandi duttu Þjóðverjar óvænt út í riðlakeppninni eftir töp gegn Mexíkó og Suður-Kóreu. Niðurstaðan varð botnsætið í riðlinum.
Mesut Özil lagði landsliðsskóna á hilluna eftir HM og sakaði forráðamenn þýska knattspyrnusambandsins um kynþáttafordóma eftir mynd sem hann birti af sér með Recep Erdogan, forseta Tyrklands.
Ekki tók betra við í Þjóðadeildinni en Þjóðverjar féllu úr A-deild með tvö stig. Þjóðverjar leiddu 2-0 gegn Hollandi á 85. mínútu í gærkvöldi en fengu síðan á sig tvö mörk og niðurstaðan varð 2-2 jafntefli.
Það þýðir að Þjóðverjar gætu endað í öðrum styrkleikaflokki þegar dregið verður í riðla í undankeppni EM þann 2. desember næstkomandi.
Tvö lið með slakastan árangur í A-deild í Þjóðadeildinni fara í annan styrkleikafokk. Ísland fer þangað og í kvöld skýrist hvort Þýskaland eða Pólland fylgi einnig með í annan styrkleikaflokk. Ef Pólland gerir jafntefli eða vinnur Portúgal í kvöld þá verða Þjóðverjar í öðrum styrkleikaflokki. Árið 2018 gæti því versnað ennþá meira hjá þýska landsliðinu í kvöld.
Hér má sjá ítarlegri grein Sky Sports um martraðarár Þjóðverja
Athugasemdir