Didier Drogba lagði skóna á hilluna á dögunum eftir magnaðan 20 ára feril sem atvinnumaður í knattspyrnu. Hann hefur miklar mætur á Jose Mourinho eftir að hafa unnið ensku úrvalsdeildina þrisvar sinnum með honum hjá Chelsea.
Mourinho er við stjórnvölinn hjá Manchester United í dag og er hann gjarnan borinn saman við Pep Guardiola, stjóra Manchester City. Þeir tóku við nágrannafélögunum á svipuðum tíma, sumarið 2016.
Gengi Pep hefur verið talsvert betra og vann Man City Englandsmeistaratitilinn í vor eftir misheppnaða tilraun í fyrra, þegar Chelsea endaði uppi sem meistari.
„Ef Mourinho hefði tekið við City þá væri hann búinn að vinna deildina tvisvar," sagði Drogba við Mirror.
„Það hefur engum tekist að fylla í skarð Sir Alex Ferguson hjá Manchester United. Þetta er gríðarlega erfitt starf og Mourinho þarf meiri tíma."
Athugasemdir