Mohamed Salah er einn af nokkrum leikmönnum sem yfirgáfu Chelsea snemma á ferlinum og eru í heimsklassa í dag.
Jose Mourinho hefur oft verið kennt um söluna á Salah en portúgalski stjórinn svaraði þeim sögusögnum fullum hálsi.
„Við skulum tala aðeins um Salah því margt sem hefur verið sagt er ekki satt," sagði Mourinho á BeIN Sports.
„Fólk lítur á mig sem þjálfarann sem seldi Salah en það gæti ekki verið fjarri sannleikanum. Ég er þjálfarinn sem keypti Salah.
„Ég spilaði gegn Basel í Meistaradeildinni og tók eftir Salah. Ég heimtaði að félagið myndi kaupa strákinn en hann kom inn á tíma þar sem samkeppnin var hörð, enda voru Hazard og Willian í miklu stuði."
Salah var 22 ára þegar hann var keyptur til Chelsea og fékk aðeins að koma við sögu í nokkrum leikjum áður en hann var lánaður, fyrst til Fiorentina og síðar til Roma þar sem hann sló í gegn.
„Hann var bara týndur strákur í London, týndur strákur í nýjum heimi. Við vildum vinna með honum og gera hann betri en hann vildi ekki bíða eftir tækifæri, hann vildi spila strax. Þess vegna lánuðum við hann í ítalska boltann.
„Okkur barst svo tilboð í hann og tók félagið ákvörðun um að selja hann, ekki ég. Ég keypti hann, ég seldi hann ekki."
Athugasemdir