Kjartan Henry fór frítt til ungverska stórveldisins Ferencvaros síðasta sumar en fékk lítið af tækifærum og ákvað því að róa á önnur mið.

Ólafur Garðarsson umboðsmaður Kjartans staðfesti þetta í samtali við Fótbolta.net í dag.

Kjartan fékk tilboð frá félögum í Danmörku, Noregi og Svíþjóð en hann ákvað að velja Vejle, sem er í næstneðsta sæti dönsku deildarinnar.

Kjartan verður 33 ára í júlí og vill fá meiri spilatíma á þessum tímapunkti ferilsins. Hann gerði mjög góða hluti með AC Horsens í danska boltanum og mun væntanlega leiða sóknarlínu Vejle í komandi baráttu.

Vejle er með 16 stig eftir 20 umferðir og er næsti leikur liðsins á heimavelli gegn SönderjyskE, níunda febrúar.