Fyrsti leikmaðurinn var kynntur í þættinum á laugardaginn en það er Davíð Þór Viðarsson, fyrirliði FH. Davíð varð Íslandsmeistari með FH 2009, 2015 og 2016.

Búinn að laga mataræðið
Davíð er orðinn 35 ára gamall og eftir tvö titlalaus ár með FH er markmið hans að bæta titli við áður en skórnir fara á hilluna frægu.

„Eins og síðustu tvö ár hafa verið hjá okkur þá er hugur í manni að enda þetta vel, enda þetta betur en síðustu tvö ár. Það er aðaldrifkrafturinn akkúrat núna," sagði Davíð í útvarpsþættinum á laugardaginn.

„Ég á eitt ár eftir af samningnum mínum og þetta fer eftir því hvernig það fer. Ef við vinnum þetta mót þá er ég hættur. Ef þið viljið losna við mig þá haldið þið með FH," sagði Davíð léttur í bragði en hann hefur sloppið vel frá meiðslum á síðari árum ferilsins.

„Ég hef verið mjög heppinn með meiðsli undanfarin ár. Ég hef ekki misst úr mikið af æfingum. Ég hef aðeins náð að taka mig í gegn hvað varðar mataræði og annað slíkt. Ég var aldrei nógu öflugur í því en það hefur verið að batna hjá mér síðustu ár. Það er gott að eiga góða að sem láta mann heyra það. Ég hef fengið að heyra það á góðlátlegan hátt hjá konunni og það átti rétt á sér."

„Ég er oftast ógeðslega leiðinlegur inni á vellinum"
Þrátt fyrir að hafa oft verið á meðal bestu leikmanna Pepsi-deildarinnar þá hefur Davíð aldrei verið valinn leikmaður tímabilsins.

„Ég hef ekki orðið þess heiðurs aðnjótandi ennþá. Þetta er ekki eitthvað sem ég hef pælt mikið í. Það eru tímabil þar sem ég spilaði það vel að mér fannst ég eiga það skilið eða eiga að koma til greina en ég hef ekki verið valinn. Aðalatriðið er að vinna titla og númer tvö er að maður sé sjálfur þokkalega sáttur með frammistöðuna," sagði Davíð en hann er með mikið keppnisskap og lætur í sér heyra innan vallar.

„Ég er oftast ógeðslega leiðinlegur inni á vellinum. Ég hef alltaf verið þannig og hef lítið lagt mig fram við að breyta því. Það getur hjálpað manni að rífa kjaft og koma sér í gang þegar maður þarf að mótívera sig," sagði Davíð sem bætti við að hann sjái eftir að hafa rifið kjaft við Sölva Snæ Guðbjargarson í leik FH og Stjörnunnar í Fótbolta.net í síðasta mánuði.

Hér að ofan má hlusta á spjallið við Davíð en þar talar hann meðal annars um sætasta titilinn og besta samherjann hjá FH.

Fylgist vel með útvarpsþætti Fótbolta.net næstkomandi laugardag þegar næsti leikmaður verður kynntur til sögunnar í liðið.