Á mánudag var sagt frá því að Brentford hefði áhuga á Rúnari Alex Rúnarssyni, markverði Dijon í Frakklandi. Fjallað var um málið í hlaðvarpsþættinum Dr. Football.
Kristján Óli Sigurðsson, annar af sérfræðingum þáttarins, segir að Brentford hafi reynt að kaupa Rúnar Alex í janúar en án árangurs. Brentford ætlar að reyna aftur við Rúnar Alex í sumar.
Í dag fjallar enski miðillinn Daily Mail um þennan meinta áhuga á íslenska landsliðsmarkverðinum.
Þar segir að Brentford sé að hugsa um að selja markvörðinn Daniel Bentley og fá Rúnar Alex í staðinn.
Rúnar Alex þekkir markvarðarþjálfara Brentford, Inaki Cana. Þeir unnu saman hjá Nordsjælland í Danmörku.
Rúnar Alex missti sæti sitt í byrjunarliði Dijon fyrir áramót en hann hefur hins vegar spilað leiki liðsins í franska bikarnum að undanförnu.
Tveir íslenskir leikmenn eru á mála hjá Brentford en það eru Kolbeinn Birgir Finnsson og markvörðurinn ungi Patrik Sigurður Gunnarsson. Þeir spila báðir með B liði Brentford.
Brentford siglir lygnan sjó í Championship deildinni í augnablikinu en liðið er í 18. sæti með 37 stig, ellefu stigum frá fallsæti.
Athugasemdir