Dalot er fæddur í Portúgal og æfði með liðinu Fintas fyrstu níu ár ævi sinnar en hann ber miklar tilfinningar til félagsins þrátt fyrir að hafa yfirgefið það ungur að aldri.

Félagið hefur verið í fjárhagsvandræðum og ákvað Dalot að kaupa rútu fyrir félagið til þess að ferja iðkendur sína á milli staða.

„Dalot hringdi í okkur í gegnum Skype, hann var með leikmönnum Manchester United. Hann sagði okkur að fara út á bílastæði og sjá hvað væri þar. Þar beið okkar rúta sem var merkt félaginu,"
segir Luís Travassos starfsmaður og þjálfari hjá Fintas.

„Hann hafði undirbúið allt án þess að nokkurn mann grunaði neitt, þetta var sjokk fyrir okkur en við erum honum ævinlega þakklátir fyrir þessa gjöf á þessum erfiðu fjárhagslegu tímum."

Dalot kom til Manchester United fyrir tímabilið en hann hefur ekki náð að festa sig í sessi í liðinu en hann hefur einungis komið við sögu í átta úrvalsdeildarleikjum.