Tíu leikir fara fram í undankeppni EM2020 í dag.

Kasakstan sem vann góðan sigur á Skotum í fyrsta leik sínum tekur á móti Rússum á gervigrasinu í Astana. Belgar sem unnu Rússa í sínum fyrsta leik heimsækja Kýpur.

Báðir leikir E-riðlis verða í beinni í dag á sportstöðvum Stöð 2. Wales fær Slóvakíu í heimsókn í fyrri leik riðilsins og Króatía heimsækir Ungverjaland í seinni leiknum. Wales sat hjá í fyrstu umferð á meðan Króatía og Slóvakía unnu sína leiki.

Stórleikur dagsins fer fram í C-riðli í kvöld. Þá taka Hollendingar á móti nágrönnum sínum frá Þýskalandi. Hollendingar unnu sannfærandi sigur á Hvít-Rússum í sínum fyrsta leik. Þjóðverjar sátu hjá í fyrstu umferð. Þeir gerðu 1-1 jafntefli við Serba í vináttuleik á miðvikudag.

Þá fara fram þrír leikir í G-riðli. Makedónar og Pólverjar höfðu sigur úr býtum úr sínum fyrstu leikjum. Slóvenar og Ísraelar gerðu jafntefli í fyrsta leik sínum.