Mannréttindaskrifstofa Reykjavíkurborgar sendi í dag frá sér tilkynningu. Í tilkynningunni er bent á að knattspyrna eigi að vera leikur án fordóma.

Vitnað er í úrskurð aganefndar KSÍ varðandi mál Þórarins Inga Valdimarssonar leikmanns Stjörnunnar og Ingólfs Sigurðssonarl leikmanns Leiknis.

Þórarinn á að hafa sagt óviðeigandi hluti um geðheilsu Ingólfs og dómari leiksins heyrði í Þórarni og gaf honum rautt spjald samstundis.

Aganefndin kaus að gera ekkert frekar í málinu og það er mannréttindaskrifstofa alls ekki sátt við. Skrifstofan biður KSÍ um að taka upp málið að nýju og fá svör frá dómara leiksins hvað nákvæmlega var sagt.

Tilkynninguna í heild sinni má sjá hér að neðan.

Tilkynning frá mannréttindaskrifstofu Reykjavíkurborgar

Knattspyrna á að vera leikur án fordóma

Um síðustu helgi gerðist það í leik Leiknis og Stjörnunnar að Þórarinn Ingi Valdimarsson leikmaður Stjörnunnar fékk rautt spjald fyrir ósæmileg ummæli í garð Ingólfs Sigurðssonar, leikmanns Leiknis. Ummælin beindust að veikindum Ingólfs en hann hefur sýnt það hugrekki að stíga fram opinberlega og fjalla um þunglyndi sem hann hafi átt við að stríða og hefur hann í þeirri umfjöllun fjallað sérstaklega um það hversu erfitt það sé í karllægum heimi fótboltans.

Aganefnd KSÍ sá ekki ástæðu til að gefa Þórarni lengra en hefðbundið eins leiks bann vegna málsins. Sá úrskurður fylgir ekki reglugerð KSÍ um aga og úrskurðamál en þar segir í 16. grein

„Hver sá sem misbýður öðrum einstaklingi eða hópi með fyrirlitningu, mismunun eða niðurlægingu í orði eða verki varðandi kynhneigð, kynferði, trúarbrögð, skoðanir, þjóðernisuppruna, kynþátt, litarhátt, og stöðu að öðru leyti skal sæta leikbanni í að minnsta kosti 5 leiki og banni frá viðkomandi leikvelli. Jafnframt skal félag viðkomandi sæta sekt að lágmarki að upphæð kr. 100.000. Ef sá brotlegi er forsvarsmaður liðs skal sekt félags nema að lágmarki kr. 150.000.“

Aganefndin er því ekki að fara eftir þeim reglum sem hún á að vinna eftir og sendir þau skilaboð að fordómar séu leyfilegir á vellinum. Greinin er skýr og veitir ekki bara heimild til að setja þann sem brýtur af sér heldur segir að viðkomandi skuli sæta leikbanni í minnst 5 leiki.

Nú hefur Guðni Bergsson formaður KSÍ sagt í viðtali við fótbolta net að skýrsla dómara hafi ekki verið nægilega vel útfyllt og því hafi aganefndin ekki getað úrskurðar samkvæmt 16. greinni. Sé það raunin er ástæða til að biðja dómarann um að fylla samviskusamlega út skýrsluna og að aganefndin taki málið upp aftur. Verði það ekki gert þá er aganefndin og þar með KSÍ að leggja blessun sína yfir fordóma.

Mannréttindaskrifstofu ber, samkvæmt mannréttindastefnu borgarinnar, að standa vörð um að borgarbúum sé ekki mismunað m.a. vegna heilsufars. Skrifstofan tekur undir tilkynningu frá Leikni um málið þar sem segir m.a. að KSÍ sé með þessum úrskurði ekki að vinna gegn fordómum heldur styðji við óásættanlega hegðun.

Skrifstofan sendir Ingólfi hlýjar kveður og hvetur aganefnd KSÍ til að taka upp málið aftur.