Markvörðurinn ungi, Karen Rós Torfadóttir, hefur staðið á milli stanganna í undanförnum leikjum en hún er fædd árið 2005. Karen Rós er því 14 ára á árinu og enn gjaldgeng í 4. flokk.

Fyrir framan hana á vellinum er hinsvegar reynsluboltinn Jóna Benný Kristjánsdóttir sem fædd er árið 1980 og er því 39 ára gömul á árinu.

Karen Rós er að stíga sín fyrstu skref í fullorðinsbolta en Jóna Benný hefur spilað með meistaraflokki með hléum frá árinu 1993 þegar hún spilaði sinn fyrsta leik fyrir Sindra aðeins 13 ára gömul.

Þær Karen Rós og Jóna Benný koma báðar úr Sindra en Sindri og Einherji stilla upp sameiginlegu liði í Lengjubikarnum. Einherji gaf út á dögunum að liðið myndi ekki leika í 2. deild í sumar og ekkert hefur verið gefið upp um áframhaldandi samstarf félaganna. Það er því ekki ljóst hvort liðin taki þátt í sameiningu í 2. deildinni eða ekki.