Leganes og Real Madrid skildu jöfn, 1-1, í gær en það var Karim Benzema sem bjargaði Madrídingum.

Hann jafnaði metin í byrjun síðari hálfleiks en hann var að skora 27. mark sitt á tímabilinu í öllum keppnum fyrir félagið.

Benzema mátti oft þola mikla gagnrýni hjá Real en hann virðist hafa fundið taktinn á ný. Margir öflugir leikmenn hafa verið orðaðir við Real Madrid að undanförnu en Zidane segir að Benzema kippir sér ekkert upp við það.

„Hann er að spila mjög vel á þessu tímabili ef við horfum á mörkin. Hann er frábær leikmaður og þetta hefur breyst á þessu ári sem þýðir að hann fær fleiri mörk," sagði Zidane.

„Hann er vanur því að það sé orðrómur um hann og að aðrir leikmenn séu á leiðinni. Það breytir engu fyrir hann samt og persónuleiki hans hefur sýnt það að hann vill bara hjálpa liðinu og hann er að gera það vel," sagði hann í lokin.