Breiðablik og Stjarnan með sigra eins og ÍA
ÍA heldur áfram að heilla með frammistöðu sinni í upphafi Pepsi Max-deildarinnar. Hversu langt getur þetta ÍA-lið komist í sumar? Það er stór spurning.
ÍA er nýliði í deildinni en í fyrstu fjórum umferðunum hefur liðið unnið KA, Val og FH.
Í kvöld fékk ÍA lið FH í heimsókn upp á Skaga. Það voru ekki margar mínútur liðnar af leiknum þegar Bjarki Steinn Bjarkason skoraði fyrsta mark leiksins. Markið skoraði hann eftir frábæra skyndisókn. Árni Snær Ólafsson í marki ÍA átti frábæra sendingu upp völlinn og upp úr því skoraði ÍA mark.
Árni Snær take a bow! #fotboltinet
— Valur Gunnarsson (@valurgunn) May 15, 2019
Staðan var 1-0 í hálfleik upp á Skaga. Þegar leið á seinni hálfleikinn fóru FH-ingar að verða pirraðari. Á 68. mínútu skoraði Bjarki Steinn sitt annað mark og kom ÍA í 2-0. Bjarki Steinn er mjög efnilegur. Hann er aðeins 19 ára gamall.
Stuttu eftir seinna markið hjá ÍA fékk Pétur Viðarsson að líta rauða spjaldið.
Sjá einnig:
Pétur við aðstoðardómarann: Ertu fokking þroskaheftur
ÍA hélt og landaði frábærum 2-0 sigri á FH, sem hefur byrjað tímabil nokkuð vel. ÍA, sem er nýliði í Pepsi Max-deildinni, er á toppnum með 10 stig eftir fjóra leiki. FH er í fjórða sæti með sjö stig.
Jóhannes Karl og ÍA appreciation tweet! Jói fer mögulega fyrr en maður heldur í þjálfun erlendis ef fram sem horfir.
— Rikki G (@RikkiGje) May 15, 2019
Vítaspyrnumark dugði Blikum til sigurs
Breiðablik heldur í við ÍA og eru bæði lið með 10 stig á toppi deildarinnar.
Breiðablik fór norður og sótti þar þrjú stig gegn KA. Það var aðeins eitt mark sem skildi liðin að og eitt mark sem kom í leiknum. Það gerði Thomas Mikkelsen úr vítaspyrnu sem hann nældi sjálfur í.
„VÍTI DÆMT!! Hann dæmir á Daníel Hafsteinsson, fyrir að brjóta á Thomas Mikkelsen!" skrifaði Daníel Smári Magnússon í beinni textalýsingu á Fótbolta.net.
Þrátt fyrir nokkrar ágætis tilraunir náði KA ekki að jafna og lokatölur 1-0 fyrir Blika. KA er í sjöunda sæti með þrjú stig eftir fjóra leiki. Eini sigur KA hingað til kom gegn Val.
Markaregn í Laugardal
Það var sannkallað markaregn á gervigrasinu í Laugardal þar sem Víkingur R. og Stjarnan áttust við.
Sóknarleikur Stjörnunnar hefur verið gagnrýndur eftir fyrstu þrjá leikina en það er ekki hægt að gagnrýna hann eftir leikinn í dag. Hilmar Árni Halldórsson og Guðjón Baldvinsson komu Stjörnunni í 3-0. Guðjón skoraði tvisvar áður en Ágúst Eðvald Hlynsson minnkaði muninn fyrir Víking.
Hinn efnilegi Alex Þór Hauksson kom Stjörnunni í 4-1 áður en annar efnilegur leikmaður, Júlíus Magnússon, minnkaði muninn fyrir Víking.
Reynsluboltinn Sölvi Geir Ottsen bjó til örlitla von fyrir Víkinga á 89. mínútu en sú von varð að engu þegar dómarinn flautaði til leiksloka og 4-3 fyrir Stjörnuna lokatölur.
Stjarnan er í þriðja sæti með átta stig á meðan Víkingur er með tvö stig í níunda sæti.
— Tómas Þór Þórðarson (@tomthordarson) May 15, 2019
Umferðin klárast á morgun með þremur leikjum.
Víkingur R. 3 - 4 Stjarnan
0-1 Hilmar Árni Halldórsson ('30 )
0-2 Guðjón Baldvinsson ('38 )
0-3 Guðjón Baldvinsson ('48 )
1-3 Ágúst Eðvald Hlynsson ('53 )
1-4 Alex Þór Hauksson ('65 )
2-4 Júlíus Magnússon ('73 )
3-4 Sölvi Geir Ottesen Jónsson ('89 )
Lestu nánar um leikinn
ÍA 2 - 0 FH
1-0 Bjarki Steinn Bjarkason ('3 )
2-0 Bjarki Steinn Bjarkason ('68 )
Rautt spjald:Pétur Viðarsson, FH ('71)
Lestu nánar um leikinn
KA 0 - 1 Breiðablik
0-1 Thomas Mikkelsen ('3 , víti)
Lestu nánar um leikinn
Athugasemdir