Fjórða umferð Pepsi Max-deildarinnar einkenndist af jafnteflum. Fótbolti.net heldur uppteknum hætti og gerir upp hverja umferð með því að halda sérstakt lokahóf eftir hverja umferð!
Lokahófið er á léttu nótunum en við erum alltaf tilbúin að taka við kvörtunum í gegnum tölvupóst!
Lokahófið er á léttu nótunum en við erum alltaf tilbúin að taka við kvörtunum í gegnum tölvupóst!
Leikur umferðarinnar: Víkingur R. og Stjarnan buðu upp á markaveislu í Laugardalnum. Stjarnan sem hefur átt í vandræðum með að skora mörk úr opnum leik hentu í fjögur mörk í grímuna á Víkingum sem svöruðu til baka með þremur. Færi á báða bóga, mistök, lélegar varnir og góðar sóknir. Stundum er eitthvað svo fallegt við það allt saman.
EKKI lið umferðarinnar:
Rúmlega helmingur EKKI-liðsins eru leikmenn ÍBV og Víkings R. sem áttu erfiða umferð. Þetta eru einmitt þau tvö lið sem eru enn án sigurs á botni deildarinnar.
Léttir umferðarinnar: Fyrsti sigur Íslandsmeistarana til tveggja ára Vals er kominn í hús eftir fjórar umferðir. 1-0 útisigur á öflugu Fylkisliði staðreynd og leikmenn, þjálfarar, stjórnarmenn og stuðningsmenn Vals geta andað léttar.
Frystikista umferðinnar: Gary Martin leikmaður Vals er út í kuldanum hjá Ólafi Jóhannessyni og var ekki í leikmannahópi Vals í sigrinum gegn Fylki. Gary Martin var meinað að æfa með liðinu á æfingunni fyrir leik og ekki er vitað hvort hann æfi með liðinu á næstu æfingu liðsins.
Stjarna fæðist: Bjarki Steinn Bjarkason. Skoraði bæði mörk ÍA í 2-0 sigri á FH. Bjarki Steinn er sonur handbolta-goðsagnarinnar Bjarka Sigurðssonar. Bjarki yngri varð 19 ára fyrr í þessum mánuði er uppalinn í Mosfellsbæ en gekk í raðir ÍA fyrir síðasta tímabil. Hann hefur vakið athygli fyrir góða frammistöðu og leikið alla leiki ÍA í Pepsi Max-deildinni í sumar.
Nýliði umferðarinnar: Hermann Ágúst Björnsson kom inná í 2-1 sigri Grindavíkur á KR í gærkvöldi. Hermann Ágúst sem verður 27 ára seinna í sumar var að leika sínar fyrstu mínútur í efstu deild. „Ég var hættur þessu og þetta var ekki í myndinni fyrir hálfu ári eða svo." sagði Hermann Ágúst í viðtali eftir leik.
Fjölmiðlalögreglan: Ólafur Jóhannesson bannaði fréttamönnum að spyrja út í Gary Martin sóknarmann Vals fyrir viðtölin eftir leik Fylkis og Vals í Árbænum. „Óli Jó neitaði að svara spurningum um Gary Martin eftir leikinn. 'Ég bara nenni ekki að tala um þennan mann' sagði hann, í grófari tón en ég er að tala núna," sagði Elvar Geir í Innkastinu í gærkvöldi.
Dónaskapur umferðarinnar: Pétur Viðarsson varnarmaður FH fékk að líta beint rautt spjald í 2-0 tapi FH gegn ÍA á Skaganum. Hann lét annan aðstoðardómara leiksins, Eystein Hrafnkelsson heyra það í miðjum leik og spurði hann, hvort hann væri þroskaheftur. Pétur Guðmundsson dómari leiksins var ekki lengi að sýna Pétri rauða spjaldið og senda nafna sinn í sturtu.
Agaleysi umferðarinnar: Guðmundur Kristjánsson slapp heldur betur með skrekkinn þegar hann keyrði aftan í Hall Flosason þegar boltinn var víðsfjarri og sló hann í andlitið í leiðinni. Pétur Guðmundsson dómari virðist ekki hafa séð högginn og spjaldaði Guðmund aðeins fyrir fyrra atvikið.
Allt í öllu umferðarinnar: Magnús Valur Böðvarsson var ráðinn vallarstjóri á Meistaravelli heimavelli KR fyrir sumarið en Maggi Bö. eins og hann er kallaður hefur verið vallarstjóri hjá Breiðabliki undanfarin ár með frábærum árangri. Eftir að Breiðablik skipti um undirlag á sínum heimavelli og fór í gervigrasið voru KR-ingar fljótir að semja Magga Bö til sín. Hann virðist nú vera allt í öllu hjá KR því í gærkvöldi var hann mættur í KR-útvarpið og lýsti þar leik Grindavíkur og KR.
Dómari umferðarinnar: Vilhjálmur Alvar Þórarinsson dæmdi leik Víkings R. og Stjörnunnar nánast óaðfinnanlega. „Vilhjálmur Alvar er besti dómari Íslands í dag," skrifaði Elvar Geir Magnússon ritstjóri Fótbolta.net í Skýrslunni um leikinn og gaf Vilhjálmi 9 í einkunn.
Sjá einnig:
Lið 4. umferðar
Það var tekið óvenju langt Innkast eftir 4. umferðina enda nýr liðsmaður vígður inn! 80 mínútur af boltaumræðum #fotboltinet https://t.co/SG4JrL4Jhx
-- Fótbolti.net (@Fotboltinet) May 17, 2019
Athugasemdir