Þrír leikir fóru fram í Inkasso deild karla í dag. Keflavík tók á móti Aftureldingu á Nettóvellinum.

Heimamenn leiddu með þremur mörkum gegn engu í hálfleik og gerði Adam Árni Róbertsson öll þrjú mörk Keflavíkur og var þar með kominn með þrennu í fyrri hálfleik.

Keflvíkingar bættu við tveimur mörkum í seinni hálfleik og kláruðu því leikinn með 5-0 sigri.

Í Breiðholti tók Leiknir á móti Njarðvík. Stefán Birgir hefur verið sjóðandi heitur hjá Njarðvík í upphafi leiktíðar og lagði upp fyrsta mark leiksins fyrir Toni Tipuric. Stefán var svo sjálfur á ferðinni tæpum tíu mínútum seinna þegar hann skoraði sjálfur með neglu upp í þaknetið.

Leiknir minnkaði muninn undir lok leiks þegar Sævar Atli fylgdi á eftir eiginn vítaspyrnu og skoraði. Leikni tókst ekki að bæta við marki og því 1-2 útisigur Njarðvíkur staðreynd.

Á Eimskipsvellinum tók Þróttur á móti Víkingum frá Ólafsvík. Ólsarar komust yfir strax á þriðju mínútu og leiddu 0-1 í hálfleik.

Í seinni hálfleik tókst heimamönnum að jafna en Ólsurum tókst að skora aftur og var þar á ferðinni Harley Willard.

Reiðhjólastrákur á fleygiferð, stelpa með hamborgara, gamall maður í göngutúr, stelpuhópur, hjólabrettastrákur. Brot af þeim sem fóru í gegnum boðvang Víkings Ó í leiknum við Þrótt í kvöld. Nema von að þeim sé skipað að setjast til að trufla ekki umferðina. #fotboltinet

— Hafliði Breiðfjörð (@haflidib) May 17, 2019

Keflavík byrjar tímabilið á þremur sigrum í fyrstu þremur leikjunum og Ólafsvíkingar eru komnir með sjö stig.