Víkingur Ó. unnu góðan baráttusigur á Fjölnismönnum í Grafarvogi í kvöld. Víkingar eru þar með komnir á toppinn yfir Fjölnismenn í Inkasso deildinni auk þess sem að þeir eiga leik til góða.
Lestu um leikinn: Fjölnir 1 - 3 Víkingur Ó.
Ejub var að sjálfögðu ánægður með frammistöðu hans liðs í kvöld hann var sérstaklega ánægður með fyrri hálfleikinn.
„Fyrri hálfleikurinn var virkilega góður, við gáfum ekki færi á okkur skoruðum tvö mörk og náðum að skapa mörg góð færi.“
Fjölnismenn komu sterkari inn í seinni hálfleikinn en Víkingar héldu forystunni allan leikinn.
„Við byrjuðum seinni hálfeikinn ekki eins vel, hleyptum þeim inn í leikinn og þeir fengu víti. En síðasta korterið vorum við skipulagðir og finnst mér þetta vera sanngjarn sigur.“
Víkingur Ó. var ekki með fullmannaðan bekk í kvöld og Ejub notaði engar skiptingar fyrr en í uppbótartíma, en hann hefur engar áhyggjur af breiddinni.
„Í dag spiluðu meiðsli inn í þetta, það eru margir meiddir hjá okkur. En það er best að spila með 11 leikmenn og þessir 11 stóðu sig vel í dag.“
Sóknarmenn Víkinga áttu mjög góðan leik en Ejub þakkar góðri liðsframmistöðu í fyrri hálfleik sigurinn.
„Mér finnst Fjölnir geta spilað miklu betur en þeir spiluðu í fyrri hálfleik, en í seinni hálfleik sýndu þeir sitt rétta andlit en við spiluðum vel á lengri köflum.“
Athugasemdir