Lestu um leikinn: Grindavík 1 -  1 ÍA

Grindvíkingar gerðu sjöunda jafnteflið í deildinni í kvöld en liðið spilaði frábæran fyrri hálfleik. Það átti þó erfitt uppdráttar í þeim síðari.

„Ég vildi sjá þrjú stig. Bæði lið fengu færi til að skora mark og vinna leikinn en góð frammistaða hjá okkur í dag og sérstaklega í fyrri hálfleik. Við vorum líklegri en þeir komast samt yfir og það var ekki alveg gangur leiksins og svo hefði ég viljað sjá eitthvað af þessum færum enda inni og fá þrjú stig," sagði Túfa við Fótbolta.net.

Vindurinn spilaði stóra rullu í kvöld en Grindavík var með vindinn í bakið í fyrri og skapaði liðið sér nokkur góð færi á meðan sá síðari var erfiðari fyrir heimamenn.

„Sammála því. Vindurinn spilaði svolítið inn í líka og það spilaðist eins og leikurinn var að þróast. Þetta var leikur tveggja góðra liða og Jói er að gera frábæra hluti og þetta var hörkuleikur en á endanum var þetta kannski sanngjarn. Kannski er ég bara ósáttur að fá ekki þrjú stig."

„Við stillum upp í dag með tvo framherja og ÍA líka því ef þeir hefðu þeir unnið væru þeir í 2. sæti. Það voru bæði lið að gefa ekkert eftir og skemmtilegur leikur fyrir áhorfendur og þetta er eina leiðin til að þróa þessa deild áfram."

„Það er pínu erfitt fyrir mig. Þetta er í sjöunda sinn sem ég stend fyrir framan liðið mitt og hrósa fyrir frammistöðu á vellinum og fá bara eitt stig. Svona er lífið og maður verður að taka því sem kemur og stig er betra en ekkert en spilamennska okkar er stígandi og stemningin í hópnum er frábær og við erum klárir fyrir næsta leik," sagði hann í lokin.

Grindavík er í 9. sæti með 13 stig.