Spánverjinn Nolito kom Sevilla yfir á 37. mínútu leiksins með hnitmiðuðu skoti innan vítateigs.

Divock Origi jafnaði leikinn stuttu áður en að flautað var til hálfleiks. Boltinn barst þá til Belgans eftir klafs í teig Sevilla sem myndaðist eftir hornspyrnu Trent Alexander-Arnold. 1-1 í hálfleik.

Fyrir utan mörkin var leikurinn ekkert sérstaklega mikið fyrir augað. Þegar tæpur stundarfjórðungur var eftir af leiknum fékk Joris Gnagnon, leikmaður Sevilla, að líta beint rautt spjald fyrir ógeðslegt brot á Yasser Larouci, ungum leikmanni Liverpool.

Þarna var um að ræða einbeittan brotavilja en hann reyndi ekkert við boltann. Larouci lá í grasinu eftir tæklingu og var að lokum borinn útaf vellinum á sjúkrabörum.

Á 90. mínútu leiksins skoraði Alejandro Pozo sigurmark Sevilla eftir undirbúning Munir El Haddadi. Lokatölur 1-2, Sevilla í vil. Annar tapleikur Liverpool í röð á undirbúningstímabilinu.