Aron Elís Þrándarson, leikmaður Álasund í Noregi, hefur tekið forystuna í í Draumaliðsdeild Eyjabita. Aron Elís, sem er uppalinn hjá Víkingi R, fylgist vel með Pepsi Max-deildinni og eftir sextán umferðir í Draumaliðsdeildinni er hann með 23 stiga forskot á Brynjar Orra Bjarnason sem er í öðru sæti. Brynjar Orri var á toppnum eftir fyrri hluta tímabils.
„Ég var ekkert að eyða allt of miklum tima í þetta til að byrja með, spilaði eina umferðina án fyrirliða þegar ég gleymdi að stilla upp liðinu en nú upp á síðkastið er ég buinn að vera sinna þessu almennilega," sagði Aron Elís við Fótbolta.net.
Nokkrir leikmenn hafa verið sérstaklega drjúgir í stigasöfnun fyrir Aron Elís í sumar.
„Óskar Örn (Hauksson), Grímsi (Hallgrímur Mar Steingrímsson) og Hilmar Árni (Halldórsson) er þrenna sem klikkar ekki, algjörar stigavélar."
Sigurvegarinn í Draumaliðsdeild Eyjabita fær í verðlaun ferð fyrir tvo á leik í ensku úrvalsdeildinni með Vita ferðum. Aron Elís vonast til að ná að halda sjó og sigla sigrinum í höfn.
„Það væri geggjað að ná að vinna þetta, maður verður að vera bjartsýnn á það," sagði Aron Elís að lokum.
Smelltu hér til að fara á síðu Draumaliðsdeildar Eyjabita
Hér að neðan má sjá liðið hjá Aroni Elís.
Athugasemdir