Sérfræðingarnir sem spáðu eru:
Atli Eðvaldsson, Ásgeir Elíasson, Guðmundur Hreiðarsson, Henry Birgir Gunnarsson, Hrafnkell Kristjánsson, Hörður Magnússon, Ólafur Kristjánsson, Víðir Sigurðsson, Þorlákur Árnason, Þorvaldur Örlygsson.

Hvað segir Ólafur?
Ólafur Helgi Kristjánsson er sérstakur álitsgjafi okkar um Landsbankadeild karla. Ólafur hefur séð mikið af leikjum á undirbúningstímabilinu og hefur gríðarmikla þekkingu á boltanum.  Hann hefur starfað við þjálfun hér á landi hjá Fram og var í mörg ár aðstoðarþjálfari hjá AGF í Danmörku.  Hér að neðan má sjá hans álit á Fylki.

Um Fylkir
Það verður spurning hvernig þeir koma til með að spila í sumar og spurning hvort Leifur breyti þeim leikstíl sem hefur verið í Árbænum í nokkurn tíma að vilja spila inn í markið.  Þeir eru áfram að spila 4-3-3 og Leifur hefur ákveðnar skoðanir á því hvernig á að spila fótbolta og vill eflaust koma því inn.  Hvort honum hafi tekist að koma sínum leikstíl inn í vetur er erfitt að segja. 

Fylkisliðið er eitt af þeim liðum sem getur haldið boltanum endalaust og hefur verið undanfarin ár en þeir hafa ekki verið nógu beittir.  Ef þeir ná að skapa jafnvægi milli þess að spila boltanum á milli sín og að vera beittir þá eru þeir stórhættulegir.  Ég er viss um að Leifur er alveg meðvitaður um það og er búinn að vera að vinna í því.  Miðað við öll önnur lið í deildinni hafa þeir misst flesta lykil leikmenn.  Það sem þeir hafa fengið í staðinn er Peter Gravesen sem er mjög öflugur leikmaður og Fjalar.   Svo hafa þeir fengið Palla og Jens úr Þrótti og það er spurningamerki með þá báða hvort þeir séu nógu sterkir til að styrkja Fylkisliðið. Palli er með gríðarlega reynslu og ég sá hann nýlega og Atli myndi bara verða stoltur af forminu sem hann er í.  Jens er ágætisleikmaður sem þarf að vera í fantaformi til að geta spilað með Fylki.

Styrkleikar:
Styrkleikar liðsins sem slíks eru að þeir eru búnir að fá nýjan þjálfara núna sem hefur verið í kringum meistaralið, góðan þjálfara sem er mjög skipulagður og ég held að gengi Fylkisliðsins muni velta mikið á því hvernig Leifur mun spila úr spilunum. Styrkleikar eru líka að þeir geta spilað fótbolta og eru flest allir með góða tilfinningu og geta spilað mjög skemmtilegan fótbolta. En það getur líka verið veikleiki því þeir hafa ekki alltaf náð því jafnvægi milli þess að spila árangursríkan og fallegan fótbolta.

Veikleikar 
Veikleiki liðsins er að þeir hafa oft ætlað að fara flóknu leiðina að markinu og þar skipir miklu máli finnst mér að Leifur nái að breyta því. Það hefur loðað við þá að vera svolítið léttir á bárunni og þeir verða að taka þetta af meiri festu innan vallar og utan, ekki síst utan vallar. Það gengur ekki með klúbb eins og Fylki og möguleikana sem þeir hafa að þeir skuli ekki ná að stíga skrefið til fulls.

Gaman að fylgjast með
Það verður gaman að fylgjast með Eyjólfi Héðinsyni og Hrafnkeli Helgasyni. Kjartan Breiðdal hefur mér þótt mjög efnilegur sem bakvörður eða kantmaður og það er synd ef hann nær ekki að spila neitt vegna meiðslanna. Christian Christiansen verður að sýna að hann sé atvinnumaður á Íslandi með reynslu í dönsku úrvalsdeildinni. Gravesen er að vísu að spila úti á kanti núna og það er erfitt að vera leiðtogi þar úti en hann er það góður leikmaður að hann á að vera lykilmaður í þessu liði.

Lykilmaður
Mér finnst að Guðni Rúnar verði að axla mikla ábyrgð miðað við þá leikmenn sem eru eftir og taka mikið á sínar herðar og verða mikill nagli í þessu liði. Haukur Ingi er víst í fantaformi og það er spurning hvernig meiðslatíðnin verða hjá honum. Ef hann verður í standi verður hann einn af styrkleikunum í liðinu með hraðann.

Þjálfarinn:
Leifur Garðarsson er þjálfari Fylkis en hann tók við liðinu í haust.   Leifur hafði áður verið aðstoðarþjálfari FH undanfarin 3 tímabil þegar FH endaði í 2. sæti fyrsta árið og varð Íslandsmeistari næstu tvö á eftir.  

Leifur sem er skólastjóri í Áslandsskóla í Hafnarfirði hefur einnig starfað við þjálfun hjá KR þar sem hann sá um yngriflokkastarf fyrir nokkrum árum.   Hann var um árabil einn besti körfuboltadómari landsins en hætti því þegar annir fóru að aukast.



Líklegt byrjunarlið Fylkis:

Spáin

Um félagið

Komnir og farnir

Leikmenn Fylkis

Leikir Fylkis