Fótbolti.net

lau 13. maí 2006 07:00

Magnús Már Einarsson

Spá fyrirliða og þjálfara í 2.deild karla: 2.sæti

Mynd: Merki

Fótbolti.net ætlar að fjalla vel um aðra deildina í sumar eins og undanfarin ár og við ætlum að hita vel upp með því að birta spá fyrirliða og þjálfara í deildinni fram að móti.

Við fengum alla fyrirliða og þjálfara til að spá og fengu liðin því stig frá 1-9 eftir því en ekki var hægt að spá fyrir sínu eigin liði. Í öðru sætinu í þessari spá var Fjarðabyggð sem fékk 135 stig af 162 mögulegum. Kíkjum á umfjöllun okkar um Fjarðabyggð sem spáð er upp úr annarri deildinni.

Fjarðabyggð
Þjálfari: Þorvaldur Örlygsson
Búningar: Rauð treyja, dökkbláar buxur, rauðir sokkar.
Heimasíða: http://www.kff.is

Fjarðabyggð komu upp úr 3.deildinni árið 2004 og voru nýliðar í 2.deild í fyrra. Þrátt fyrir það var liðið lengst af í efri hluta deildarinnar. Lengi vel átti liðið möguleika á sæti í 1.deild en liðið gaf eftir á lokasprettinum og hafnaði í 4.sæti sem er besti árangur félagsins frá upphafi. Í ár er stefnt á að gera betur og er ráðning Þorvaldar Örlygssonar, sem þjálfara liðsins, staðfesting á því. Félagið gerði 3 ára samning við Þorvald og að þeim tíma liðnum stefna Fjarðabyggðarmenn á að vera komnir í Landsbankadeild karla. Göfugt markmið en fyrsta markmið þeirra er að tryggja sér sæti í 1.deild og að því stefna þeir í sumar. Félagið hefur styrkt sig fyrir átökin í 2.deild í sumar og fengið sterka leikmenn. Elmar Dan Sigþórsson kemur frá Víkingi en hann sleit krossband á síðasta ári en er allur að koma til. Koma hans er hvalreki á fjörur Eskifjarðar þar sem hann rak á land.

Þorvald þjálfara þarf vart að kynna. Hann lék mestan sinn feril sem atvinnumaður á Englandi með liðum á borð við Oldham, Notthingham Forrest og Stoke. Flutti heim og tók við þjálfun KA en lét af störfum í fyrra vegna veikinda dóttur sinnar. Náði góðum árangri hjá KA og kom
meðal annars liðinu í bikarúrslit árið 2003.

Haukur Ingvar Sigurbergsson snýr aftur á heimaslóðir eftir að hafa yfirgefið félagið árið 2003 þegar liðinu mistókst að tryggja sér sæti í 2.deild. Hann kemur reynslunni ríkari til baka eftir að hafa leikið með KA í Landsbankadeild karla árið 2004 og svo 1.deildinni í fyrra. Andri Hjörvar Albertsson mun leika með liðinu í sumar en hann kemur frá Grindavík. Andri er uppalinn hjá Þór en fór til Grindavíkur til að freista gæfunnar. Hann mun án efa reynast liðinu gífurlegur styrkur. Einnig hefur liðið fengið Jóhann Inga Jóhannsson frá HK. Jóhann lenti í erfiðum meiðslum fyrir 2 árum en virðist vera að ná sér. Hann var kosinn knattspyrnumaður HK árið 2004.

Koma þessara sterku leikmanna mun án efa hjálpa þessu unga Fjarðabyggðarliði í baráttunni í 2.deildinni í sumar. Liðið tapaði ekki leik í Deildabikarnum en fóru þrátt fyrir það, ekki upp úr riðlinum. Það er ljóst að liðið kemur reynslunni ríkari til leiks eftir tímabilið í fyrra þegar liðið lenti í 4.sæti. Liðið hefur misst fáa leikmenn og náð að styrkja lið sitt gífurlega.

Styrkleikar: Uppgangurinn í knattspyrnunni á Norðfirði mun hjálpa liðinu án nokkurs vafa í baráttunni í sumar. Áhuginn á knattspyrnunni er gríðarlegur og ætlar félagið sér stóra hluti. Reist verður knattspyrnuhöll á Reyðarfirði sem er tilbúin eftir um mánuð og einnig verður lagt gervigras á gamlan malarvöll á Neskaupstað. Það er ljóst félagið leggur gríðarlega áherslu á að komast upp úr 2.deildinni í ár og munu bæjarbúar eflaust leggja sitt á vogarskálarnar til að hjálpa liðinu með góðum stuðning.

Veikleikar: Veikleikar liðsins í fyrra var án nokkurs vafa heimavöllur liðsins. Þrátt fyrir að það kunni að hljóma einkennilega þá er það staðreynd. Liðið náði "einungis" í 15 stig á heimavelli í fyrra af 27 mögulegum og það er ljóst að liðið má ekki við slíkum stigafjölda í ár. Að öllu jafna ætti heimavöllur liðsins að gefa þeim mun fleiri stig. Náðu í 14 stig á útivelli sem er fínn árangur en liðið þarf að fækka jafnteflisleikjum á heimavelli. Það er spurning hvernig Þorvaldur stillir upp varnarlínu liðsins en liðið missti þá Helga Jones og Víglund Pál Einarsson. Að sama skapi hefur liðið fengið Andra Hjörvar og Hauk Ingvar Sigurbergsson.

Lykilmenn: Elmar Dan Sigþórsson, Haukur Ingvar Sigurbergsson, Andri Hjövar Albertsson,

Komnir: Andri Hjörvar Albertsson frá Grindavík, Jóhann Ingi Jóhannsson í láni frá HK, Elmar Dan Sigþórsson frá Víkingi R., Haukur Ingvar Sigurbergsson frá KA, Ingimar Guðmundsson frá Leiknir F., Andri Bergmann Þórhallsson frá Huginn.

Farnir: Helgi Jones í Þór, Víglundur Páll Einarsson í Þór og
Matthías Spencer Heimisson í Leikni F.