Fótbolti.net

lau 13. maí 2006 08:02

Hafliði Breiðfjörð

Spá Fótbolta.net í Landsbankadeild: 2. sæti

Sérfræðingar Fótbolta.net spá ÍA 2. sæti í Landsbankadeild karla 2006. Tíu sérfræðingar spá í deildina fyrir okkur þetta árið en þeir raða liðunum upp í röð og það lið sem er í efsta sæti fær tíu stig, annað sæti níu og svo koll af kolli niður í tíunda sæti sem gefur eitt stig. ÍA fékk 83 stig út úr þessu.

Sérfræðingarnir sem spáðu eru:
Atli Eðvaldsson, Ásgeir Elíasson, Guðmundur Hreiðarsson, Henry Birgir Gunnarsson, Hrafnkell Kristjánsson, Hörður Magnússon, Ólafur Kristjánsson, Víðir Sigurðsson, Þorlákur Árnason, Þorvaldur Örlygsson.

Hvað segir Ólafur?
Ólafur Helgi Kristjánsson er sérstakur álitsgjafi okkar um Landsbankadeild karla. Ólafur hefur séð mikið af leikjum á undirbúningstímabilinu og hefur gríðarmikla þekkingu á boltanum. Hann hefur starfað við þjálfun hér á landi hjá Fram og var í mörg ár aðstoðarþjálfari hjá AGF í Danmörku. Hér að neðan má sjá hans álit á ÍA.

Um ÍA
Það er kúltúr fyrir því að spila fótbolta uppi á Skaga. Skaginn spilar eins og Skaginn hefur alltaf spilað. Það er mikill kraftur í þeim, mikill vinnuvilji og fullt af ungum leikmönnum sem eru mjög sprækir. Svo eru þeir með sterkan karakter sem þjálfara sem pískar þá áfram og veit alveg hvað þarf til að ná árangri. Í fyrra fannst mér hann ná mjög vel að koma því til skila til liðsins.

Stundum spiluðu þeir mjög einfaldan fótbolta og aðra stundina náðu þeir að spila mjög áferðarfallegan bolta. Fyrst og fremst finnst mér vera einkennandi þessi mikli kraftur sem er í Skagaliðinu sem ég hef hrifist af, og þá sérstaklega í fyrra.

Styrkleikar:
Skytturnar þrjár eru komnar aftur. Þeir eru búnir að fá fjóra mjög góða leikmenn til sín. Þeir hafa misst Gulla, Finnboga og Reyni, þar af tvo hafsenta sem var kjölfestan í liðinu í fyrra. Þegar brann á hjá þeim þá voru þeir tveir að spila vel. Voru búnir að spila saman lengi. Það er spurning hvernig þeir leysa þær stöður núna.

Bjarni hefur verið að spila þarna og þeir fengu Árna Thor frá HK sem er mjög sterkur leikmaður. Ég hef trú á að hann geti komið þarna inn og leyst þessa stöðu mjög vel. Helgi Pétur Magnússon hefur verið að spila þessa stöðu líka hann er sterkur og stór strákur. Þeir gætu líka myndað gott miðvarðarpar.

Veikleikar
Það er erfitt með þá eins og flesta aðra að tala um veikleika eftir að hafa bara séð æfingaleiki og deildabikar. Það gæti verið veikleiki að Gulli og Reynir eru farnir, og þar með reynsla úr liðinu en þar á móti kemur að Þórður, Bjarni og Arnar eru með gríðarlega reynslu. Veikleikarnir gætu orðið miðvarðarstaðan og varnarleikurinn. Fram á við eru þeir alveg nógu sterkir. Það hefur alltaf loðað við Skagann að spila öflugan varnarleik og ég hef trú á að þeir nái að kítta í að Gulli, Reynir og Finnbogi eru farnir.

Gaman að fylgjast með
Það verður gaman að sjá Bjarna, Þórð og Arnar aftur, engin spurning. Ég held að Arnar komi til með að eiga gott tímabili uppi á Skaga ef hann sleppur við meiðsli. Svo eru ungir strákar þarna. Ellert Jón, Hafþór Ægir og Helgi Pétur. Þeir unga út leikmönnum á Skaganum og það er engin tilviljun. Dean Martin á sínum góðu dögum er mjög öflugur líka.

Lykilmaður
Það segir sig sjálft að Þórður, Bjarni og Arnar koma til með að verða lykilmenn í þessu liði en ef við tökum það sem við köllum stjörnur í burtu tel ég að Árni Thor komi til með að skipta miklu máli, hann á að vera lykilmaður í þessu liði. Svo er það markvarslan hjá Bjarka.

Þjálfarinn:
Gamli jaxlinn Óli Þórðar hefur komið víða við á sínum ferli en þrátt fyrir það hefur hann verið gallharður Skagamaður allan tímann. Hann hóf sinn þjálfunarferil hjá Fylki en þar þjálfaði hann við góðan orðstír 1998-1999. Ólafur tók síðan við þjálfun ÍA fyrir síðasta leik liðsins haustið 1999 og hefur hann verið þjálfari liðsins síðan þrátt fyrir ótal gylliboða ár eftir ár frá öðrum liðum. Undir hans stjórn hefur ÍA einu sinni orðið Íslandsmeistari, tvisvar sinnum bikarmeistari og deildabikarmeistari.

Líklegt byrjunarlið ÍA:

Völlurinn:
Akranesvöllur tekur í heildina um 6000 áhorfendur. Stúkan sem er öðrum megin við völlinn tekur 570 í sæti en auk þess er pláss fyrir áhorfendur allt í kringum völlinn meðal annars í grasbrekkum. Talan 6000 er kannski ekki alveg rétt þó því árið 1996, á lokaleik umferðarinnar í leik ÍA og KR voru 7700 áhorfendur.

Stuðningsmenn:
Meðal þekktra stuðningsmanna ÍA eru: Brynjólfur Þór Guðmundsson fréttamaður á NFS, Jóhann Ársælsson alþingismaður, Gísli Gíslason framkvæmdastjóri Faxaflóahafna, Óli Palli dagskrárgerðarmaður á Rás 2, Gunni Sig bakari, Valdimar K Friðriksson þingmaður, Árni Ibsen rithöfundur, Jakob Einarsson leikari, Gísli S. Einarsson, Benedikt Helgason bílasali í Reykjavík. Arnór Pétursson fyrrum formaður Sjálfsbjargar, Helgi B. Daníelsson.

Spáin
nr.	Lið	Stig
1	FH	97
2	ÍA	83
3	KR	74
4	Valur	73
5	Keflavík	65
6	Fylkir	46
7	Víkingur	33
8	ÍBV	30
9	Grindavík	25
10	Breiðablik	24

Um félagið

Íþróttabandalag Akranes
Stofnað 1946

Titlar:
Íslandsmeistarar: 1951, 1953, 1954, 1957, 1958, 1960, 1970, 1974, 1975, 1977, 1983, 1984, 1992, 1993, 1994, 1995, 1996, 2001.
Bikarmeistarar: 1978, 1982, 1983, 1984, 1986, 1993, 1996, 2000, 2003.
Deildabikarmeistarar: 1996, 1999, 2003.

Búningar:
Gool

Aðalbúningur:
Peysa: Gul og svört / Buxur: Svartar / Sokkar: Gulir og svartir

Varabúningur:
Peysa: Hvít og blá / Buxur: Hvítar / Sokkar: Hvítir og bláir

Opinber vefsíða:
ÍA.is/KIA

Stuðningsmannasíða
Skagamenn.com

Komnir og farnir

Nýjir frá síðasta sumri:

Þórður Guðjónsson frá Stoke City
Bjarni Guðjónsson frá Plymouth
Arnar Gunnlaugsson frá KR
Árni Thor Guðmundsson frá HK

Farnir frá síðasta sumri:

Gunnlaugur Jónsson í KR
Finnbogi Llorens í HK
Reynir Leósson til Trelleborg
Þorsteinn Gíslason í Þrótt
Guðmundur Páll Hreiðarsson í Huginn
Andrés Vilhjálmsson í Þrótt
Águst Örlaugur Magnússon í Víking
Unnar Örn Valgeirsson hættur
Sigurður Ragnar Eyjólfsson - meiðsli óvíst hver hann fer.