Þorsteinn Már tryggði KR sigur í úrslitum Lengjubikarsins

KR-ingar eru Lengjubikarmeistarar 2012 eftir 1-0 sigur á Fram í úrslitaleiknum sem fram fór í kórnum í dag.

Fyrri hálfleikur var heldur bragðdaufur og mikið um miðjumoð. Í liði Fram varð Steven Lennon að fara meiddur af velli í fyrri hálfleik en í hans stað kom hinn ungi Hólmbert Aron Friðjónsson.

Hólmbert átti síðan besta færið fyrri hálfleik þegar hann skallaði knöttinn í stöngina eftir aukaspyrnu frá Sam Tillen. Liðin skiptust á að sækja undir lok fyrri hálfleiks en hvorugu liðinu tókst að skora svo markalaust var í hálfleik.

KR-ingar byrjuðu betur í seinni hálfleik og á 57. mínútu skoraði Þorsteinn Már Ragnarsson sigurmark KR. Það skoraði hann með skalla eftir fyrirgjöf frá Óskari Erni sem var ný kominn inná sem varamaður.

KR réði ferðinni í kjölfarið án þess þó að skapa sér hættuleg færi. Fram var nærri búið að jafna leikinn undir lokin þegar Sveinbjörn Jónasson komst í gott skotfæri en brást bogalistinn. Lokatölur 1-0 sigur KR.