Breiðablik réði ekki við FH-taktinn

FH-ingar voru í stuði gegn Breiðabliki í kvöld og unnu 3-0 sigur. Hafnarfjarðarliðið fór fremur rólega í gang en þegar það fann taktinn átti vörn Blika engin svör.

Markvörðurinn Sigmar Ingi Sigurðarson var besti maður Breiðabliks og kom í veg fyrir algjöra slátrun.

Varnarleikurinn hefur verið mjög öflugur í byrjun móts en í leiknum í kvöld var það sóknarleikurinn sem vakti mesta athygli. Ólafur Páll Snorrason og Atli Guðnason fóru þar fremstir í flokki og voru hreint frábærir.

Blikarnir voru leiddir til slátrunar og gagnrýndi Ólafur Kristjánsson, þjálfari liðsins, réttilega baráttuleysi leikmanna í kvöld.