Faglega klárað hjá stelpunum okkar í slóvenska sveitaþorpinu. Yfirburðirnir voru miklir og sigurinn aldrei í hættu. Slóvenska liðið ógnaði aldrei af viti. Ísland barðist meira og lét finna fyrir sér. Bæði mörkin eftir löng innköst. Íslenskara verður það ekki.

Þegar Gunnhildur Yrsa sá um að brjóta ísinn og kom Íslandi yfir. Það skipti miklu máli að koma inn markinu og Gunnhildur gerði það af harðfylgi.

Ísland er komið á topp riðilsins og verður þar allavega í sólarhring. Sigur í þessum leik og íslenska liðið er enn með spilin á sínum höndum í þessum riðli. Næsti andstæðingur eru Færeyingar á þriðjudag, lið sem á að vera auðveld bráð.

Leikurinn gekk algjörlega að íslenskum óskum en færanýtingin hefði mátt vera aðeins betri. Þá var spilamennskan aðeins of hæg á köflum.

Köflótt frammistaða hjá ensku dómurunum en á heildina bara sallafínt.