Annað mark Skagans var að öllum líkindum rangstaða og hefur alltaf áhrif á úrslit leiksins. Á sama tíma vantaði þó einfaldlega aðeins upp á gæðin og hugmyndaflugið á síðasta vallarþriðjungi hjá báðum liðum til að loka leiknum.

Hliðarlínubíóið stal því miður senunni en það fer nokkrum sögum af því sem átti sér stað. Í stuttu máli voru varamannabekkirnir eitthvað að skipta sér af hvorum öðrum og úr varð furðuleg atburðarrás þar sem stoppa þurfti leikinn til að fara yfir málin. Líf og fjör!

Afturelding/Fram eru enn í 7. sæti en komnar með 7 stig í 8 leikjum, þar af fjögur úr jafnteflisleikjum. Skagakonur eru með 16 stig í 3. sæti þegar þeirra leikjaprógramm er hálfnað. Liðunum var spáð 8. og 3. sæti af fyrirliðum og þjálfurum deildarinnar í vor og eru á því á svipuðum slóðum og búist var við.

Erfitt og óþarft að taka einstaka leikmenn út í svona leik. Allar að reyna og engin með falleinkunn þó margar hafi átt slatta inni.

Ég er 97% viss um að annað mark Skagans hafi verið rangstaða og það eru dýrkeypt mistök að leyfa því að standa. Þá er snúið að dæma um hlut dómaranna í þeirri reikistefnu sem varð á milli varamannabekkjanna í kringum hálfleikinn. Úr blaðamannastúkunni séð virtust þeir hleypa þessu upp í ákveðið bíó sem hefði mátt stytta töluvert. Ábyrgðin er þó að sjálfsögðu ekki bara þeirra enda fólkið á bekkjunum sem byrjaði.