Léleg færanýting heimamanna. Þeir áttu svo sannarlega færin til að skora mörk í dag en inn vildi boltinn ekki. Leikurinn var jafn en þó átti Magni betri færin og því skrifast tapið helst á þetta atriði.

Hér mætti setja rauða spjaldið, en það var samt þannig að Magnamenn virkuðu ekki færri. Atvikið var miklu frekar vítaspyrnan sem Steinþór fékk dæmda á sig. Skipti sköpum í þessum leiki.

Magnamenn eru núna með bakið uppvið vegg og geta ekkert farið nema upp á við. Eru núna fjórum stigum frá ÍR og Njarðvík í næstu sætum fyrir ofan. Útlitið er dökkt, en það er alltaf von. ÍR á sama tíma fær byr undir báða vængi, jafntefli gegn HK í síðasta leik og nú sigur. Þeir voru mjög ánægðir í leikslok.

Ívar Örn Árnason átti svosem ágætis leik, áður en hann lét reka sig út af á frekar heimskulegan hátt. Var á gulu og brýtur þá mjög viljandi á andstæðingi, aftan frá. Svoleiðis er gult í öllum reglubókum. Áhorfendur í stúkunni mótmæltu lítið og hafa sennilega bölvað sínum manni í hljóði.

Gerði allt rétt í þessum leik, öll spjöld verðskulduð en ÍR-ingar voru orðnir fullæstir í að fá fleiri spjöld í lokin. Hefði auðveldlega getað misst stjórn á þessum leik, það var harka í honum, en hann hélt vel í taumana.