Innkoma Guðmundar Steins Hafsteinssonar réði baggamuninn í dag í fyrsta Pepsi-deildarleiknum á nýju gervigrasi í Árbænum. Elís Rafn Björnsson fékk rautt spjald fyrir að tækla Guðmund Stein og sóknarmaðurinn stóri og stæðilegi skoraði síðan bæði mörk leiksins. Stjarnan var heilt yfir líklegri aðilinn og verðskuldaði sigurinn. Fylkisvörnin hélt vel fram að rauða spjaldinu en varnarleikur Árbæinga hefur batnað mikið í síðustu leikjum. Fylkir hafði haldið hreinu í tveimur leikjum í röð áður en kom að leiknum í kvöld.

Rauða spjaldið á Elís er stærsta atvikið í leiknum í dag. Helgi Mikael dómari var fljótur á vettvang með rauða spjaldið á lofti eftir tæklinguna. Fylkismenn höfðu haldið Stjörnunni vel í skefjum áður en kom að því.

Stjarnan skellti sér á toppinn en liðið er með betri markatölu en Breiðablik. Fylkismenn eru aftur á móti komnir í fallsæti með lakari maraktölu en Fjölnir sem gerði jafntefli við KR í kvöld.

Elís fékk rauða spjaldið á mikilvægum tímapunkti í leiknum. Engin illska var í tæklingu hans en Elís var hins vegar of seinn og fór með sólann of hátt í Guðmund Stein eftir baráttu upp við vítateig Stjörnunnar. Rautt spjald niðurstaðan.

Helgi Mikael hafði nóg að gera síðustu 20 mínúturnar og mörg spjöld fóru á loft. Flest þeirra voru hárrétt. Rauða spjaldið er rétt samkvæmt bókinni sem og vítaspyrnan. Vel gert hjá Helga. Fylkismenn vildu rangstöðu í síðara markinu en erfitt var að dæma um það.