Auðvelda svarið er svo hljóðandi: Eyjamenn nýttu færin sín. FH-ingar hefðu hæglega getað skorað í leiknum en inn vildi boltinn ekki.

Gunnar Heiðar skoraði annað mark ÍBV úr vítaspyrnu undir blálok fyrri hálfleiks eftir að Ívar Orri dómari leiksins dæmdi vítaspyrnu á Crawford sem fékk boltann í hendina. Hvort um réttan dóm sé að ræða verður hægt að deila um og gaman verður að sjá atvikið aftur í sjónvarpinu. Þetta atvik vó þungt leiknum.

Eyjamenn eru nú komnir með 19 stig í 8. sæti og geta andað rólega um stund eftir slæmt tap í síðasta leik. Vonbrigði FH-inga halda áfram er liðið sem stendur í 5. sæti og gæti farið neðar eftir að allir leikir umferðarinnar klárast.

Hvernig Jákup Thomsen spilaði 85 mínútur í þessum leik er með hreinum ólíkindum. Hann var aldrei líklegur í leiknum og í þeirri stöðu sem FH var í, tveimur mörkum undir er ótrúlegt að Færeyingurinn hafi ekki verið tekinn fyrr útaf.

Erfiðleikastig leiksins var yfir meðallagi en Ívar Orri kom sér vel frá þessu. FH-ingar kvarta yfir vítaspyrnudómnum sem Eyjamenn fengu. Ívar Orri var vel staðsettur í því atviki. Hvort Eddi Gomes hefði átt að fá sitt annað gula spjald í fyrri hálfleiknum og hvort FH hefði átt að fá víti í fyrri hálfleiknum er hægt að deila um. Ívar var samkvæmur sjálfum sér og það hallaði á hvorugt liðið.