Færanýting. Bæði lið fengu frábær færi til að skora sigurmarkið í bráðskemmtilegum leik, sér í lagi var skemmtanagildi síðari hálfleiks mjög mikið. Markvörslur skiptu vissulega máli en þó fóru of fá skot á rammann úr fínum færum.

Á 78.mínútu á Hjörtur Logi frábæra sendingu inn í markteig þar sem Steven Lennon stekkur hæst og hamrar að marki í átt að vinstra horninu þaðan sem sendingin kom. Ótrúlegur hraði í fótavinnu Arons og hárrétt handarhreyfing bjó til bestu markvörslu sumarsins að mínu mati - og hún taldi í lokin. Á ensku heitir þetta point-blank-save.

FH er komið þremur stigum á eftir KR í baráttunni um fjórða sætið sem gefur Evrópusæti. Fylkismenn lyfta sér upp fyrir Fjölni í 10.sætið en gætu endað aftur í því 11. ef að Grafarvogspiltar vinna Víking á morgun.

Færeyingarnir í liði FH áttu sérlega erfitt. Jákup Thomsen einfaldlega kom ekki við sögu í lýsingu leiksins, enda fór allt fram án þess að hann næði að snerta það. Strákurinn hefur allt til þess að bera sem ætti að nýtast honum en það er bara ekki nóg þegar maður kemst ekki í takt við leikinn. Brandur Olsen sýndi margt í upphafi móts en í kvöld var hann á hægri ferð allan leikinn, reyndi við of flókna hluti og tapaði alltof mörgum boltum. Þurfa að rífa sig í gang ef þær ætla að verða um borð hjá FH mikið lengur.

Held áfram að dæla út níum...og alltaf er það þannig að manni finnst leikirnir létt dæmdir. Það segir örugglega eitthvað um tríóin. Sigurður hélt flottri línu allan leikinn og það án þess að nokkur yrði svo glatt var við hann. Allar ákvarðanirnar stóru réttar. Vel gert.