Sóknarþungi ÍBV í upphafi leiks réði úrslitum. Cloé Lacasse var þar fremst í flokki og setti fjögur mörk, í öllum regnbogans litum.

Fjórða mark ÍBV var algjört rugl. Boltinn barst inn í teig HK/Víkings og lá leikmaður þeirra eftir eftir samstuð. Allir í heiminum sáu að stöðva ætti leikinn en boltinn barst aftur inn í hættusvæðið og ÍBV skoraði fjórða markið. Stór dómaramistök.

ÍBV vann og HK/Víkingur tapaði. Úrslitin þýða í raun lítið annað, þannig er staða liðana í deildinni.

Þetta skrifast því miður á dómaratríóið og er það rökstutt í skrifum um dómarann, eins leiðinlegt og mér finnst að skrifa um slaka dómgæslu.

Ragnar Þór Bender er ekki reynslumikill dómari og vona ég að hann nái sér eftir þessa frammistöðu hér í dag og bæti sinn leik. Allir geta jú átt slæman leik, eins og þjálfari gestanna benti á. Hafandi sagt það var frammistaðan hrein hörmung. Tónninn var gefinn í upphafi leiks þegar hann og AD1 sáu um að dæma rangt í þrígang. Ragnar var mjög óákveðinn, virtist draga úr hatti ákvarðanir sínar og fékk enga aðstoð frá sínum aðstoðarmönnum. Atvikið sem valið var atvik leiksins var mikið klúður. Þá skildi ég ekki alveg atburðarásina í lok leiks þegar Bryndís Lára, markvörður ÍBV, fór af harðfylgi á eftir boltanum og náði honum og lenti í samstuði sem Ragnar dæmdi ekki á. Leikmaður ÍBV hrinti við sóknarmanni Víkings og uppskar fyrir það gult spjald. Á meðan á þessu stóð hélt Bryndís á boltanum og ekkert hafði verið dæmt en allt í einu dæmdi hann aukaspyrnu á sóknarmann gestanna eftir að henni hafði verið hrint. Er það ekki bara víti? Allavega. Margt stórfurðulegt og bitnaði það helst á gestunum en réði sannarlega ekki úrslitum leiksins.