Valsmenn virtust vera sprungnir á því undir miðbik seinni hálfleiks eftir að KR minnkaði muninn í 2-1. Gríðarlega jafn og fjörugur leikur þar sem gull af marki frá Pablo Punyed skildi liðin af.

Það er tvennt sem kemur upp í huga minn sem atvik leiksins. Sigurmark Pablo Punyed var af dýrari gerðinni. Aukaspyrna meter fyrir framan vítateig Vals. Upp í vinkilinn, sláin inn óverjandi fyrir Hannes í markinu. Frábær spyrna og mark sem skilaði KR-ingum þremur stigum. Þá verð ég einnig að minnast á miðvörðinn, Finn Tómas Pálmason gerði mistök í öðru marki Vals en sem betur fer fyrir unga drenginn hafði það ekki áhrif á úrslitin. Þessi ungi leikmaður hefur komið gríðarlega sterkur inn í vörn KR en hann svekkir sig líklega á þessu marki sem Valsmenn skoruðu. Finnur Tómas er með ótrúlega tölfræði á meistaraflokksferli sínum. Hann hefur leikið 18 meistaraflokksleiki með KR og Þrótti R. og aðeins tapað einum leik. Er nýr Finnur sem allt vinnur að fæðast í Vesturbænum?

KR fer á toppinn með 20 stig en Valsmenn eru enn í 9. sæti deildarinnar með sjö stig.

Ívar Örn Jónsson hefur sennilega oft átt verri leiki hvað varðar spilamennsku en það er þó ekki hægt að horfa framhjá því að Ívar Örn kom inná sem varamaður í stöðunni 2-0 fyrir Val. Sex mínútum síðar er staðan orðin jöfn 2-2 og 22 mínútum eftir að hann kom inná var KR komið í 3-2. Menn hafa haft betri áhrif á sitt eigið lið með innkomu sinni í leik.

Erfiður leikur að dæma. Ívar Orri fór ágætlega í gegnum þetta. Nokkur atriði hér og þar sem bæði lið kvörtuðu yfir en þegar upp er staðið var það ekki Ívar Orri sem réði úrslitum og það er það sem skiptir öllu máli.