Fyrri hálfleikurinn í dag var eitt það alversta sem sést hefur hjá Njarðvíkingum og Haukar gengu á lagið og kláruðu dæmið þegar þeir fengu tækifærið. Njarðvíkingar virkuðu ekki tilbúnir í dag og Haukamenn nýttu sér það og jörðuðu þá grænu.

Fimmta og síðasta mark Hauka. Brynjar Atli er með boltann aðeins út úr teignum hjá sér og reynir að sparka fram en Daði Snær nær að komast fyrir og er komin einn fyrir opnu marki þegar hann rekur boltann upp að marklínu áður en hann beygir sig svo niður og skorar með skalla, óþarfa niðurlæging sem maður á ekki að sjá í fullorðnisbolta.

Haukar færa sig upp úr fallsæti og senda þá grænklæddu niður fyrir rauða strikið.

Njarðvíkurliðið sem heild átti vondan dag.

Mjög tilviljunarkenndir dómar. 3-3 í höfuðhöggum, menn meiddir af velli og mikil harka. Haukar áttu að fá víti sem ekki var dæmt og heilt yfir var þetta ekki góður dagur á skrifstofunni í dag.