Gæði. Hrein gæði. NK Maribor, 2019 útgáfan er einfaldlega eitt besta lið sem mætt hefur til landsins að spila Evrópuleik. Voru í fyrsta gír í fyrri hálfleik og náðu að skora samt. Seinni hálfleikinn settu þeir í hreinan fluggír og kláruðu dæmið eins og atvinnumennirnir sem þeir eru.

Í 0-1 stöðu fær Óli Kalla dauðafæri sem hann skallar í jörðina og klobbar markmanninn sem nær þó að skófla boltanum um 2 sentimetra frá því að úr yrði mark. Það hefði orðið allt annar leikur ef mark hefði komið þar.

Maribormenn munu fara í næstu umferð forkeppni Meistaradeildarinnar. Valsmenn munu fara vel yfir leiki Ferencvaros og Ludogorets til að kynnast mótherjanum í leiknum þeirra sem kemur í Evrópudeildinni eftir að þeir hafa klárað seinni leikinn í þessari viðureign í Slóveníu.

Ógeðslega ósanngjarn titill í dag. Valsmenn börðust eins og ljón við ofureflið en ef á að pikka eitthvað út þá var sóknarfærslan á miðjunni ekki alveg að ganga vel. Í fyrri hálfleik voru færi til þess sem menn þorðu ekki alveg að taka, Kristinn Freyr helst svo við látum hann sitja uppi með Svarta Pétur en það er ekki sanngjarnt í svona leik.

Hann Kryzstof frá Póllandi getur flogið heim sáttur með sínum mönnum. Ekki erfiður leikur að dæma en hann gerði það vel, hélt flottri línu.