Bæði mörk leiksins voru í ódýrari kantinum en það breytir því ekki að sigurinn var fyllilega verðskuldaður hjá Haukum. Eftir jafnræði fyrsta hálftímann eða svo náðu Haukar fínu taki á leiknum og sigldu sigrinum örugglega í höfn.

Haukar voru 1-0 yfir þegar Sierra Marie sleppur ein gegn Telmu. Telma á ekki annan kost í stöðunni en að reyna vinna boltann af Sierru en tekst það ekki og tekur hana niður. Verandi aftasti maður fékk hún réttilega rautt spjald fyrir vikið. Haukar skoruðu annað mark sitt stuttu síðar og lokuðu leiknum.

Haukar færast nær liðinu í 4. sæti og eru nú aðeins stigi á eftir Tindastól. Augnablik er áfram í 6. sæti en liðið hefur nú spilað fjóra leiki án þess að sigra.

Markverðir Augnabliks taka þetta á sig. Telma Ívarsdóttir átti að gera betur þegar Sæunn Björnsdóttir skorar beint úr hornspyrnu fyrir Hauka. Telmu var svo vikið af velli í síðari hálfleik eftir að hafa brotið á Sierru Marie Lelii utan teigs. Varamarkvörðuinn Bryndís Gunnarsdóttir kom í kjölfarið inná í sínum fyrsta meistaraflokksleik en missti boltann klaufalega frá sér í öðru marki Hauka.

Ekkert yfir tríóinu að kvarta. Dæmdu leikinn mjög vel.